#Jan25
Update 11.02.2011 6:02 PM
Monday, January 31, 2011
Sunday, December 12, 2010
∞
هو انا عايش ليه؟
الله سبحانه و تعالى خلق الإنس و الجن علشان تعبد الله سبحانه و تعالى
أنا إنسان اعبده ليه؟
علشان هو اللى خلقك
و حايستفيد ايه لما اعبده؟
هو امرك انك تعبده و تشكره
هو مين قال إن فيه الله سبحانه و تعالى؟
و الله سبحانه و تعالى فين؟
الله سبحانه و تعالى موجود فى كل مكان و زمان
و الله سبحانه و تعالى جه ازاى؟
و الله سبحانه و تعالى عباره عن إيه؟
الله سبحانه و تعالى هو الخالق و أنا المخلوق
النحات هو اللى عمل تمثال من حجر
النحات ليه خصائص غير التمثال الجماد اللى من حجر
فلا يقارن الله سبحانه و تعالى بخصائص البشر المكون من وجه و عينين و نتاج ولاده
لإن التمثال من حجر شىء
و النحات شىء آخر
الله سبحانه و تعالى قال انه موجود
الله سبحانه و تعالى هو الخالق و أنا المخلوق
النحات هو اللى عمل تمثال من حجر
النحات ليه خصائص غير التمثال الجماد اللى من حجر
فلا يقارن الله سبحانه و تعالى بخصائص البشر المكون من وجه و عينين و نتاج ولاده
لإن التمثال من حجر شىء
و النحات شىء آخر
الله سبحانه و تعالى قال انه موجود
عرفت من القرآن إنه موجود
القرآن كلام الله سبحانه و تعالى الموجه للبشريه
و ايه الدليل إن القرآن كلام الله سبحانه و تعالى؟
طب ليه الله سبحانه و تعالى ما ظهرش و قال إنه موجود؟
كانت كل الناس آمنت بيه
لو الله سبحانه و تعالى كان عاوز الناس كلها تؤمن بيه كان عمل كده
طب ليه الناس المؤمنه عاوزه الناس اللى مش مؤمنه انها تؤمن بالله سبحانه و تعالى لو الموضوع كده
و مين قال إن فيه حساب و جنه و نار؟
الله سبحانه و تعالى قال كده
و ليه فيه حساب و جنه و نار؟
علشان الناس المؤمنه بالله سبحانه و تعالى و عملت اعمال كويسه تدخل الجنه و الناس اللى مش مؤمنه بالله سبحانه و تعالى و عملت اعمال وحشه تدخل النار
الله سبحانه و تعالى ممكن يغفر الذنوب كلها إلا الشرك بالله سبحانه و تعالى
المؤمن بالله سبحانه و تعالى اللى عمل اعمال وحشه حايدخل النار شويه و بعدها حايدخل الجنه للابد
و اللى مش مؤمن بالله سبحانه و تعالى حايدخل النار للابد
يعنى ايه للابد؟
يعنى بلا نهايه
يعنى ايه بلا نهايه؟
يعنى يعيش عالطول عالطول عالطول
و بعدين؟
ما فيش بعدين
إلى اللا نهائيه
و المؤمن بالله سبحانه و تعالى اللى عمل اعمال وحشه و ربنا رحمه ممكن الله سبحانه و تعالى ما يدخلوش النار خالص
طب اللى عمل اعمال كويسه بس مش مؤمن بالله سبحانه و تعالى حايدخل النار؟
و اللى عمل اعمال وحشه و مؤمن بالله سبحانه و تعالى حايدخل الجنه؟
يعنى اللى عمل اعمال وحشه و اغتصب و سرق و قتل و مؤمن بالله سبحانه و تعالى و تاب قبل ما يموت و حايدخل الجنه بعد النار احسن من اللى عمل اعمال كويسه و ساعد الفقراء و الايتام و عمل اعمال صالحه و كان طيب مع الناس بس مش مؤمن بالله سبحانه و تعالى و حايدخل النار؟
هل الخير من الله سبحانه و تعالى و الشر ايضا من الله سبحانه و تعالى؟
ام الشر خلق نفسه؟
ام هناك اله للخير و اله للشر و الاتنين ينتظرا من سيفوز فى نهايه لعبه الحياه؟
هل الحياه و خلق الشيطان الرجيم و الانسان الخير و الانسان الشرير و الحروب و الحساب و الجنه و النار نوع من العبثيه أو التسليه؟
هل الخير من الله سبحانه و تعالى و الشر ايضا من الله سبحانه و تعالى؟
ام الشر خلق نفسه؟
ام هناك اله للخير و اله للشر و الاتنين ينتظرا من سيفوز فى نهايه لعبه الحياه؟
هل الحياه و خلق الشيطان الرجيم و الانسان الخير و الانسان الشرير و الحروب و الحساب و الجنه و النار نوع من العبثيه أو التسليه؟
الله سبحانه و تعالى رحيم و انت ما تعرفش الله سبحانه و تعالى حايحاسب الناس ازاى
الله سبحانه و تعالى عارف مين حايدخل الجنه و مين حايدخل النار
يبقى احنا مصيرين؟
احنا مخيرين
اللى عاوز يؤمن بالله سبحانه و تعالى هو اللى بيختار يؤمن بالله سبحانه و تعالى و اللى مش عاوز يؤمن بالله سبحانه و تعالى هو اللى بيختار ما يؤمنش بالله سبحانه و تعالى
الله سبحانه و تعالى هو اللى خلقنا و اعطى الحريه لكل واحد يختار طريقه
اكن الحياه فيلم
الله سبحانه و تعالى خلقك و اعطاك الحريه تختار طريقك و سجل الفيلم ده و عرف فى آخر الفيلم انت اخترت اى طريق و عرف مصيرك الجنه أو النار و انت الوقتى عايش الحياه اكنه حاضر و الحياه فى الحقيقه ماضى و انتهى و الله سبحانه و تعالى عارفه
بتحاول تحلل الموضوع بنفسك مش كده؟
يعنى اللى اتولد اعمى اختار انه يبقى اعمى و اللى ما بيعرفش يخلف اختار انه ما بيعرفش يخلف و اللى ماشى و خبطته عربيه و اتشل اختار إنه يتخبط بالعربيه و يتشل؟
الله سبحانه و تعالى عامل الحياه اختبار لكل إنسان
الحياه اختبار محكم بالعدل لكل البنى ادمين و الفائز هو اللى يعرف يتغلب على صعوبات الحياه
و ليه فيه حياه اصلا اللى البنى ادم عايشها؟
علشان الله سبحانه و تعالى طلع ادم و حوا من الجنه و نزلهم على الارض و احنا اولادهم
و ليه الله سبحانه و تعالى طلعهم من الجنه؟
علشان خالفوا امر الله سبحانه و تعالى و اكلوا التفاحه من الشجره المحرمه
و ليه اكلوا التفاحه؟
علشان الشيطان غرهم
و ليه غرهم الشيطان؟
علشان الشيطان رجيم
و ليه الشيطان رجيم؟
علشان الشيطان خالف امر الله سبحانه و تعالى و ما سجدش لادم
و ليه الشيطان خالف امر الله سبحانه و تعالى؟
علشان الشيطان قال لربنا انه ازاى هو يسجد لادم اللى اتخلق من طين و هو اتخلق من نار
و ليه النار احسن من الطين؟
و مين خلق الشيطان؟
الله سبحانه و تعالى خلق الشيطان
و ليه الله سبحانه و تعالى خلق الشيطان مادام عارف إن الشيطان مش حايسجد لادم و إن ادم مش حايفضل فى الجنه و إن البنى ادم حايعيش على الارض؟
يعنى البنى ادم احسن من الجن؟
و الجن عنده برضه حساب و جنه و نار؟
و الجن عايش فين؟
و الجن عندهم برضو رسل و قرآن؟
و الجن عارف عن الإنسان و الارض؟
و ليه فيه موت؟
علشان الحياه ما فيهاش الابديه
و مين قال إن ده موت؟
ما ممكن بعد الموت يكون فيه حياه بس بطريقه تانيه
أو الواحد يتولد فى زمن و مكان تانى
أو البشر كلهم فى كل الازمنه شخص واحد
أو الإنسان بعد الموت بيتحول لجان
معقوله الناس فضلت تتناقل قصه الرسل عبر السنين و حتى الآن
و القصص تقريبا مضمونها واحد مع بعض التغييرات
و مذكوره كلها فى القرآن
و الا ده حواديت و تقاليد الشعوب
معقوله واحد أو بعض الاشخاص فضلوا يجمعوا القصص دى و يتعبوا نفسيهم و يعملوا القرآن
و ايه الدليل إن القرآن كلام الله سبحانه و تعالى؟
و ليه ما يكونش محمد صلى الله عليه و سلم هوه اللى كتب القرآن؟
لإن محمد صلى الله عليه و سلم كان لا يعرف القراءه و الكتابه
و القرآن لا احد حتى يومنا هذا ممكن يكتب ايه أو سوره منه
و علشان الله سبحانه و تعالى قال إنه حفظ القرآن من التحريف
طب مين قال إن محمد صلى الله عليه و سلم ما كانش يعرف القراءه و الكتابه
و هوه اللى قال إن القرآن محفوظ من التحريف؟
السيره النبويه و الاحاديث هى اللى قالت كده
و ليه فيه احاديث؟
علشان تعاليم الدين الإسلامى مش كلها مذكوره فى القرآن زى كيفيه الصلاه و الحج و علشان نتعلم تطبيق الإسلام الصحيح عمليا فى حياه الرسول صلى الله عليه و سلم
و ليه التعاليم لم تذكر فى القرآن؟
و مين قال إن الاحاديث دى صحيحه؟
الائمه اللى جمعوا الحديث تأكدوا من ده
و مين قال إن الائمه ما غلطوش؟
مش الائمه بشر
و ليه محمد صلى الله عليه و سلم اخر الانبياء؟
و ليه الله سبحانه و تعالى ارسل المسيح مادام عارف إن ناس كتيره حاتؤمن انه ابن الله سبحانه و تعالى و إنه عاش علي الأرض بكامل ألوهيته ولكن في صورة انسان و مات على الصليب و دفن بس قام و بعد كده عاش على يمين الله سبحانه و تعالى؟
أو إن المسيح هو الله سبحانه و تعالى؟
ازاى الله سبحانه و تعالى يموت؟
أو إن المسيح اتصلب ومات علشان تدفع ثمن خطيئه البشريه؟
و ليه يدفع ثمن خطيئه البشريه لو هو اللى عمل البشريه؟
و لو المسيح الله سبحانه و تعالى ازاى مريم عليها السلام ولدته؟
و مين اللى خلق مريم عليها السلام؟
أو الرمزيه هو المقصود
و ليه ما يكونش الدين المسيحى صح و الدين اليهودى صح و الدين الإسلامى صح و كل الاديان اللى بتؤمن بوحدانيه الخالق صح مادام كلهم بيؤمنوا بنفس الله سبحانه و تعالى و إن دى حكمته فى الموضوع؟
و ليه الله سبحانه و تعالى ارسل كل الرسل دى؟
علشان كل قوم فى كل زمن يعرف عن الله سبحانه و تعالى
الله سبحانه و تعالى ارسل رسل ذكروا و رسل لم يذكروا فى القرآن
و ليه ما فيش معجزات فى زمننا ده؟
و ليه زمان كان فيه معجزات ايام الرسل؟
علشان الناس تؤمن بإنه رسول من الله سبحانه و تعالى
و ليه حتى فى وجود المعجزات زمان كان فيه كفار و لم يؤمنوا؟
و ليه ايام محمد صلى الله عليه و سلم كان فيه كفار؟
و ليه البشريه كلها ما اسلمتش لو الإسلام هو الدين عند الله سبحانه و تعالى؟
و ليه المسيحى و اليهودى ما بيؤمنش بالإسلام و المسلم بيؤمن بالمسيح و موسى؟
و ليه المسلم ما بيؤمنش بالقرآنيين و البهائيين و البوذيه و السينتولوجيه؟
اكيد الاديان التانيه برضو فيها دلائل جعلت الناس تؤمن بالاديان دى و انا ما اتعرفتش عليها زى ما الناس اللى مؤمنه بالاديان التانيه ما اتعرفتش على دلائل الدين بتاعى
هل كنت حاقتنع بالدلائل بتاعتهم و اعتنق ديانتهم ام همه اللى حايقتنعوا بالدلائل بتاعت دينى و يعتنقوا ديانتى؟
اكيد الاديان التانيه برضو فيها دلائل جعلت الناس تؤمن بالاديان دى و انا ما اتعرفتش عليها زى ما الناس اللى مؤمنه بالاديان التانيه ما اتعرفتش على دلائل الدين بتاعى
هل كنت حاقتنع بالدلائل بتاعتهم و اعتنق ديانتهم ام همه اللى حايقتنعوا بالدلائل بتاعت دينى و يعتنقوا ديانتى؟
معقوله الناس قعدت تألف كل القصص و الخرافات دى و سمتها دين؟
و كل التعاليم الدينيه دى علشان ايه؟
على مر العصور و القرون؟
هل الدين هو الوهم الجماعى؟
مجموعه من الناس عاوزه تصدق حاجه و تخلى اللى ما صدقش يصدق؟
مجموعه من الناس بتحاول تستخدم الحاجه اللى اسمها الدين لاهداف سياسيه و اقتصاديه و شخصيه؟
و يحاولوا يجدوا دليل علشان تصدق؟
و لو ما فيش دليل يقول ماهو هوه ده الإيمان
و يحاولوا يجدوا دليل علشان تصدق؟
و لو ما فيش دليل يقول ماهو هوه ده الإيمان
إنك تؤمن بشىء من باب الإيمان بالشىء
و العالم يولع و البنى ادمين يقتلوا فى بعض
و كل ده حكمه من الله سبحانه و تعالى لا نعلم عنها شىء
زى ما بيتقال
هل الدين افيون خدر كل واحد عايش فى مجتمع متدين محاط بالمساجد و الكنائس و القنوات الدينيه و جعله يمشى مع الركب بدون تفكير؟
ليه ما يكونش العالم جه بالصدفه؟
و إن الإنسان نوع من الكائنات زى الحيوان و النبات و الجماد
و إن الكوكب اضخم كائن حى
مش لازم كل كائن يبقى عنده عينين و بق و مناخير
و إن الفضاء ده مع الارض و كل الكواكب و المجرات داخل جسم كائن ضخم
زى الفيروسات مع كرات الدم داخل جسم الإنسان
ليه كان فى ديناصورات زمان؟
علشان فى اثار هيكل الديناصورات
و البنى ادم البدائى كان ضخم كما تقول الروايات
فين هيكل هذا البنى ادم الضخم لو كان جه بعد الديناصور؟
موسى عليه السلام عاش سنين و سنين ايام فرعون
و الله سبحانه و تعالى ارسله بمعجزات كثيره لا تنسى كمعجزه السحره و البحر
ليه ما فيش حد من الفراعنه كتب القصه دى على الجدران؟
و فين سفينه نوح عليه السلام؟
و فين ملك سليمان عليه السلام؟
أو ذو القرنين و يأجوج و مأجوج؟
لو دوله من الدول ارسلت صاروخ يضرب الكعبه هل ستظهر معجزه كسحابه تحيط الكعبه و تكون كصدر واق يدمر الصاروخ فيؤمن و يسلم كل من على كوكب الارض فى ليله؟
لو الله سبحانه و تعالى عاوز كده ما عملش كده ليه؟
لو ولاده الإنسان هى بدايته و موته هو نهايته ليه الواحد ما يقدرش يولد نفسه بس يقدر يموت نفسه؟
حاخسر ايه لو آمنت بالله سبحانه و تعالى و طلع فى الآخر ما فيش الله سبحانه و تعالى؟
بس حاخسر كتير لو ما آمنتش بالله سبحانه و تعالى و طلع فى الآخر إن فيه فعلا الله سبحانه و تعالى
حاخسر ايه لو آمنت بالله سبحانه و تعالى و طلع فى الآخر ما فيش الله سبحانه و تعالى؟
بس حاخسر كتير لو ما آمنتش بالله سبحانه و تعالى و طلع فى الآخر إن فيه فعلا الله سبحانه و تعالى
هل الله سبحانه و تعالى خلق مخ الإنسان بحدود معينه لا يستطيع مخه أن يفكر بعدها؟
زى الابديه و ازاى الله سبحانه و تعالى جه و ايه اللى كان قبل الله سبحانه و تعالى؟
هل البشريه تنتظر يوم القيامه و ما فيش يوم قيامه؟
هل على سواق ميكروباص عتبه و على ام سيد بتاعه الخضار و عم محمد البواب و كيمو بتاع الفيديو جيم و معالى الوزير و سياده الرئيس أن يفكروا فى كل هذا؟
هل كان فيه يوم فى حياتهم فكروا فى كل هذا؟
ام هى عيشه و السلام؟
اتعلمنا الدين من ابله عفت فى الفصل
حفظت السوره و كتبتها صح فى الامتحان
اقطع ايد اللى سرق
اقطع ايد اللى سرق
مصر هى امى
محمود بتاع الكشرى بقى الحج محمود
اقتل الزوج اللى زنا
اقتل الزوج اللى زنا
يلا نصوم عاشوراء
الغناء حرام
حتى لو الخنزير نضيف حرام ناكله علشان الله سبحانه و تعالى قال كده
ساعات بصلى و ساعات ما بصليش
العذرا ظهرت امبارح فوق الكنيسه ونورت
العذرا ظهرت امبارح فوق الكنيسه ونورت
و حانحرر المسجد الاقصى من ايدى الطغاه
اقتل اللى خرج من الدين
اقتل اللى خرج من الدين
لو ما غطتش شعرى حادخل النار
استمنيت
قول الدعاء ده و ادخل برجلك اليمين المسجد
بخرى سلوى يا ماما
شوفت حاربى لحيتى و ابطل اشرب بيريل
ما تطهرى بتك يا وليه
دع الخلق للخالق
دع الخلق للخالق
صراع الحضارات
اللهم اجعل قبرى روضه من رياض الجنه
حوار الاديان
ستعذب على كل كبيره و صغيره مثل اللفظ السىء كأحه و نيك و نظره عابره على مؤخره امرأه و هذا المقال الذى يعد من عمل الشيطان
توب يا اخى
توب
أنا آمنت بالله سبحانه و تعالى
و سلمت نفسى لله سبحانه و تعالى
و آمنت برسول الله محمد صلى الله عليه و سلم
و آمنت بكل الملائكه و الكتب و الرسل
و آمنت باليوم الآخر
بعد ما شعرت بصلتى بالله سبحانه و تعالى
و صله الله سبحانه و تعالى بى
بعد ما شعرت بصلتى بالله سبحانه و تعالى
و صله الله سبحانه و تعالى بى
آمنت بعد أن قرأت القرآن
الدليل على إن القرآن كلام الله سبحانه و تعالى
إعجاز القرآن نفسه
القرآن الكريم هو معجزه هذا الزمان
لو قرأت كل الدنيا القرآن و تدبرته
لآمنت كل الدنيا بالله سبحانه و تعالى
و لوجد الإنسان معنى الحياه
Tuesday, December 07, 2010
اللى انتم عارفين قصدى مين
كنت متخيل إن لما اللى انتم عارفين قصدى مين يموت، إن الدنيا حاتتقلب، و حايحصل فوضى، و إنه حايكون حدث عظيم الكره الارضيه حاتنفجر علشانه
كنت فاكر إن لما اللى انتم عارفين قصدى مين يموت، إن الدنيا مش حاتتصلح، و الخير مش حايعم ، و احوال الناس مش حاتتحسن، و معيشتهم مش حاتبقى فل، و الامل فى بكره حايبقى مش حقيقه
معظمنا كان فاكر إن لما اللى انتم عارفين قصدى مين يموت، حايموت بالسكته القلبيه، أو السكته الدماغيه، حايموت على السرير، حايموت على الارض، و لكنه مات فى السما، الطياره وقعت و هوه و عيلته و صحابه كلهم ماتوا، يعنى هو مات، مراته ماتت، عياله ماتوا، احفاده ماتوا، صحابه ماتوا، كل اللى كانوا فى الطياره ماتوا، و مش غريبه إنه ما ماتش لما الطياره وقعت على الارض، مات و لسه الطياره فى السما، و فى نظرية بتقول إنه مات و بعدها الطياره وقعت، و نظريه إنه يكون مات مسموم من الاكل اللى على الطياره، بس لغايه الوقتى مش عارفين ازاى الطياره وقعت، اكيد فى صله بين موته و وقوع الطياره
انت مو زعلان علشان اللى انتم عارفين قصدى مين مات؟
تومى
كان فيه فتره فى عقل كل واحد فينا تخيل إن اللى انتم عارفين قصدى مين حايعمر الف سنه، أو ميت مليون سنه، و هو لما مات كانت صدمه استمرت ميت فمتو ثانيه، و اخيرا كل واحد رجع لحاله، حاله لما اللى انتم عارفين قصدى مين كان عايش، الفلاح صحى الصبح و شرب الشاى و قعد يلعب دومينو على القهوه، الموظفه صحيت الصبح قرأت الجرنال و قمعت تلاته كيلو باميه على المكتب، و التلميذ اللى فى ابتدائى صحى الصبح و راح المدرسه علشان ينط السور و يشرب سجاير مع صحابه و يلعب ويى فى النت كافيه، و الشاب صحى الصبح و لم صحابه علشان يتظاهروا امام نقابه العاطلين، و انا صحيت الصبح اكتب عن الموضوع ده
تو
اللى انتم عارفين قصدى مين مات، والناس ماتت من زمان، و أنا مت لدرجه إنى حتى بعد لما اللى انتم عارفين قصدى مين مات بقول على اللى انتم عارفين قصدى مين اللى انتم عارفين قصدى
Monday, November 01, 2010
الغيره القاتله
لو كان القتل حلال لإخماد نيران الغيره لكنت قتلته
صحيت النهارده كفته مشويه من حفله امبارح...الحفله اللى انا و زميل السكن دى جى كووك عملناها لزميلنا يوو الجديد فى السكن...حفله فجرت كل الاحقاد و الغيره القاتله اللى مازالت بتتفجر داخلى حتى كتابه هذه الكلمات
البدايه كانت من 6 اسابيع...لما ارمى بوى اللى كان ساكن معانا فى الشقه تعثر فى دفع ايجار الشقه للمره العاشره...فقرر دى جى كووك طرده من الشقه و عمل اعلان بحث لساكن جديد...و بعد ما ارمى بوى اتطرد لقيت دى جى كووك بيقول لى إن فى ساكن جديد خلاص حايسكن من اول اكتوبر...قولت له طب مش كنت تاخد رأيى الاول...فى اللحظه دى تذكرت ايام المعاناه من سنه لما كنت بادور على شقه و كل يوم اروح اعمل من اربعه لست انترفيوهات و مقابلات مع سكان كل شقه علشان اكون سعيد الحظ و افوز بالسكن معاهم...عاوزين يشوفوا مين اللى حايسكن معاهم...جنسه ايه و دينه ايه و فكره ايه و ثقافته ايه...كل مره كنت باترفض...يمكن علشان شكلى معفن...أو علشان مجنون من سرايه المجانين...أو علشان ارهابى عربى مسلم...أو لون بشرتى داكنه تدل على عدم استحمامى إلا كل عيد...لدرجه انى كنت لازم اسكن مؤقتا فى شقق قذره لشهور حتى وجدت الشقه اللى أنا ساكن فيها بالحظ و توفيق من الله...مش وقته احكى اتقبلت ازاى بس كان كوسه بالمختصر المفيد...كو سه...المهم قررت إن لما حد جديد حايسكن فى شقتى لازم اتلذذ فى عمل مقابلات مع الراغبين فى السكن و اسألهم اسئله محرجه و اذلهم و ارفض طلباتهم فى السكن زى ما اتعمل معايه
ازاى زميلى فى السكن يقبل بسكن واحد جديد اسمه يوو من غير ما ياخد رأيى و بدون تردد والا تفكير...ده اللى كان محيرنى...ده اللى كان حايجننى...ازاى الفرصه دى تروح منى...ازاى يجى واحد يسكن معانا من غير ما اعرفه و اشوفه...قال لى هو جاى علشان تتعرف عليه و لو معجبكش ممكن نلاقى اى طريقه دبلوماسيه نزحلقه بيها...بس هو حايعجبك
يوم المقابله فتحت الباب جالى زغطه من المفاجأه...لقيت واحد وسيم عضلات شبه الموديلز و ممثلين السيما واقف بيمد ايديه و بيقول بصوت رجولى عميق أنا يوو و جاى اتعرف عليك...دى جى كووك كلمنى عنك كتير...قولت له اتفضل...قعدنا احنا التلاته فى اوضه دى جى كووك و ابتدى يحكى انه فى بكالوريوس طب اسنان و جاى من فرنسا بعد ما درس سنه هناك ... و... و...و لقيت دى جى كووك بيجيب عقد الايجار و بيبصلى علشان اديله الاو كيه
اوكيه...حاقول ايه...بصراحه ما فيهوش حاجه تتعاب...الفكر ده جه اكيد لآلاف الناس اللى قابلته فى حياته
و جه اول اكتوبر و لقيت يوو جاى باحدث نوع عربيه شبابى مع اصحاب مش عارف اعدهم و جايب العفش من فرنسا و كل واحد من صحابه شايله حاجه...اللى شايل الدولاب..اللى شايل السرير...اللى شايل التلفزيون...و نزلت اساعد قال عامل فيها راجل...و بمنتهى السهوله و اليسر اوضته خلصت فى يوم...و بصيت عليه هوه و حبيبته اللى كانت واقفه بتتفرج على العمليه و بتشرب سيجاره... و تذكرت لما جيت انقل هنا و المعاناه اللى عانيتها و ازاى شلت العفش خمس ادوار لواحدى و العرق و البهدله و ازاى إن الموضوع عندى اخد اسابيع... مش يوم...يوم يا يوو
غرت لما شوفت ازاى حول غرفه الساكن القديم إلى مملكه فى غايه الجمال...غايه الشياكه...و بغير لما اسمعه و هوه بيذاكر بمزاج على اغانى الجاز اللى مشغلها...و بغير اكتر لما باسمع ضحكاته و ثرثراته مع صاحبته و همه مع بعض فى الاوضه بالليل...غيره بتقطع شرايين قلبى و امخاخى
قولت علشان الغيره تروح اعمله عمل كويس...قولت له عاوز اعملك حفله استقبال يا يوو...يعنى ايه رأيك أنا و دى جى كووك و حبيبته و أنت و حبيبتك نخرج نروح حته بره مثلا أو نعمل حفله صغيره هنا بمناسبه قدومك للشقه الجديده...قال قشطه نعمل حفله هنا يوم الاحد الاسبوع اللى جاى مع الهالويين بارتى...كوول يا مان...قشطه جدى
اول امبارح روحنا أنا و هو و دى جى كووك نشترى اكل و شرب و خمره و ويسكى و مستلزمات الحفله...قولت له عاوزين نعرف كام واحد كده حايجى علشان نعرف نجيب كميه اكل و شرب قد ايه...يعنى انا مثلا قولت لزميله ليه و مم...و تلاته قالولى مش حايقدروا يجوا...يعنى اتنين من ناحيتى حايجوا شوور...لقيت يوو بيقول لى ...اتنين بس؟...انا عملت اعلان على الفيس بووك...و تقريبا تلاتين واحد من صحابى حاييجوا...و لقيت دى جى كووك بيقول إن عشرين واحد حايجوا من ناحيته...اتصدمت...و حاسيت بإنى عاوز الارض تنشق و تبلعنى...و شكيت إنى عندى اصحاب...و شكيت فى وجودى الاكزيستنسياللى...و اشترينا كراتيين من الأكل و الشرب و أنا مش مصدق لسه...و يوو فضل طول الليل اول امبارح يطبخ بمهاره و يفنن فى الاكل...و أنا الغيره عماله تفور فيه...عماله تفور...نافور
و يوو فضل امبارح من الصبح يحضر للحفله...و دى جى كووك يحضر فى معداته الموسيقيه...و عزم دى جى لوكاس فوه مع فرقته علشان يعمل هوه موسيقه كمان...و الناس ابتدت تدخل البيت الصغير الضيق...و الاصحاب عمالين يتوافدوا...و الشقه ابتدت تتملى...و الموسيقه الصاخبه عماله تهز الحيطان و ارجاء المكان...و الناس عماله تشرب و تتكلم...تاكل و تتكلم...و ترمى فتافيت فى الارض
مش عارف ليه تذكرت افلام المراهقين الامريكيه امثال اميريكان باى...بنات عماله تتفعص...و ناس من كتر الثماله نايمه على الارض...طابور على الحمام... الشقه صعبت عليه...ناس عماله تدخل من الشارع و مش عارف مين جاى من طرف مين و مين مع مين...حيص بيص...عك مكس شيك...ولاد نايمين مع بنات على سريرى...ناس غريبه عماله تلعب فى اوضتى...تفتح دواليبى...و تستكشف فانلاتى و كيلوتاتى...حاسيت بدوخه...و البيت اتملى دخان...هوه الحشيش ريحته ايه...و لقيت يوو بيرقص مع حبيبته فى قمه السكر و النشوه...و الا هوه هنا...استمتاع إلى النهايه...و بدأت فكره القتل
مش عارف ليه تذكرت افلام المراهقين الامريكيه امثال اميريكان باى...بنات عماله تتفعص...و ناس من كتر الثماله نايمه على الارض...طابور على الحمام... الشقه صعبت عليه...ناس عماله تدخل من الشارع و مش عارف مين جاى من طرف مين و مين مع مين...حيص بيص...عك مكس شيك...ولاد نايمين مع بنات على سريرى...ناس غريبه عماله تلعب فى اوضتى...تفتح دواليبى...و تستكشف فانلاتى و كيلوتاتى...حاسيت بدوخه...و البيت اتملى دخان...هوه الحشيش ريحته ايه...و لقيت يوو بيرقص مع حبيبته فى قمه السكر و النشوه...و الا هوه هنا...استمتاع إلى النهايه...و بدأت فكره القتل
الساعه اربعه الفجر فضلت انفض الشباب اللى نايمه مريله على سريرى...و مرجعه على الارض... ناس نايمه فى المطبخ... ناس نايمه فى الحمام...قولت طظ فيكم جاتكم القرف و روحت نمت على الكنبه
لما صحيت النهارده من الغيبوبه...و لسه بواقى الناس متبعثره فى اوضتى... و واحد بيلعب فى التلاجه الفاضيه بيدور على هم هم...عرفت إن الكلام اللى بنعلمه لولادنا مش الحقيقه...إن "الجمال مش فى الشكل...الجمال فى الروح"...ده كلام فارغ...إن الجمال الشكلى و الجاذبيه بيسهلوا الطريق للواحد فى حياته بطرق غير مباشره من غير ما يحس...زى ما خلله يوو يبقى فى الشقه بدون إى مجهود...فما بال الواحد لما يكون عنده جمال الشكل و جمال الروح...و طيب...و مهذب...المزز حتتهافت عليه...الاصحاب بالمئات...المعلمه فى المدرسه حتتأثر من غير ما تحس و تعطيه درجات اعلى من اللى يستحقها...فما بالك لو فعلا يستحقها...و بالمجموع العالى حايدخل كليه القمه...و حاينجح بمساعده ثنائى جمال الروح و الشكل...و فى العلاقات حاينجح...و لو فشل هناك مئات الفرص امامه للنجاح...و لما يتخرج هوه اللى حياخد الوظيفه...علشان مثالى من حيث الشكل و الروح و المخ و و و ...و حاينجح فى معظم مراحل حياته و و و...يعنى لو فشل كطبيب اسنان و انا لا اظن طبعا...حاينجح كممثل...كمذيع...كبياع ملابس حريمى...لإن زمنا زمن "الجاذبيه مفتاح النجاح و السعاده"...البت المزه اللى شكلها حلو حاتنجح فى امتحات الشفوى طبعا...و لو سقطت فى التحريرى حتنجح برضو...و هى اللى حاتتجوز...و هى اللى لو قدمت على وظيفه سكرتيره حاتاخدها...و لو عاوزه تفوز بدور البطوله فى الفيلم حاتبص للمنتج و تبقى البطله...يعنى يا عزيزى لو شكلك زباله و اصلع و بنضاره...امشى جنب الحيط و اسكت...هششش...اخرس
يوو عنده كل حاجه...يوو معاه كل حاجه...يوو عايش كل حاجه...و أنا غيران منه
يوو عنده كل حاجه...يوو معاه كل حاجه...يوو عايش كل حاجه...و أنا غيران منه
علشان انا شكلى قرد اقرع من بولاق الدكرور... يبقى لازم اتجوز ملكه جمال العالم... علشان يبقى فيه امل احسن النسل...و الشكل...بس الاول لازم اقتل الغيره اللى فيه...غيرتى القاتله...قبل ما ارتكب جريمه و اقتله النهارده بالليل
Saturday, October 02, 2010
Hidden Faith
أنا لحد دالوقتى ما عملتش اعلان رسمى إنى مسلم
أنا اتولدت و لقيت نفسى و أنا صغير بروح الجامع يوم الجمعه مع بابا و اعمل نفس الحركات اللى بابا بيعملها
و يفضل يجيبنى يمين و شمال و أنا مش فاهم
و افضل اقول هو فيه ايه يا بابا
فيه ايه يا بابا
ما يرضش عليه
و أنا فى المدرسه الاجنبيه لقيت شويه من صحابى ما بيحضروش درس الدين فى المدرسه
و أنا فاكر انهم غايبين
و لما طلعلى شنب و عملت البطاقه و بقى مكتوب جنب خانه الديانه كلمه مسلم
وعيت وقتها إنى مسلم
كنت فاكر إن دى واضحه للناس كلها و مش محتاجه تتدون على البطاقه
زى ما الناس ما شايفه الشنب و عارفه إنى ذكر مش انثى
و شايفه شكلى و لون بشرتى و عارفه إنى مصرى مش كورى
و إنى شاب ما عداش التلاتين و لا الاربعين و الا التمانين
بس لغايه النهارده و لسه ما عملتش إعلان رسمى عن ديانتى
الديانه الحاجه الوحيده اللى بانتمى اليها فى حياتى
لإنى و الا بانتمى لبلدى
و الا لشعبى
و الا للغتى
أنا بانتمى للى خلقنى
عاوز اقول للعالم كله انى مسلم
مؤمن بالله الذى لا اله إلا هو
و أن محمدا عبده و رسوله
و إن دينى هو الإسلام
و أنا بأعتز بيك و بأفتخر بيك يا إسلام
و لما جيت علشان اعلن الخبر ده
عرفت إن نتيجه الإعلان ده حاتكون نهايه حياتى
فأجلت إعلان الحقيقه
حقيقه إنى مسلم
الواحد عايش فى بلاد الالحاد و بيروح فى سريه للجامع
بنصلى فى اوضه مخزن جنب مصنع البيره
خايف يدخل المتطرف برشاش يخلص على المصلين و الستات اللى بجلاليب و حجاب
الواحد عايش فى بلاد يسوع
بيحرقوا فيه القرآن كبدايه
ده قبل ما يحرقوا اللى بيقرأوا الكتاب
الواحد عايش فى بلاد الإسلام
لو سرقت حايقطعوا ايديك
و لو غلطت مع واحده و انت مش متجوز حايجلدوك
و لو غلطت مع واحده و انت متجوز حايرجموك لغايه ما تموت
و لو شاذيت برضو حايرجموك لغايه ما تموت
و لو تاجرت فى المخدرات حايعدموك
و لو اغتصبت واحده برضو حايعدموك
و لو قتلت واحد بقصد حايقتلوك
و لو قولت طب مش عاوز ابقى مسلم
حاينسفوك
لو مسيحيه و قولتى بقيت مسلمه
اهلك حايخدوا العزا فيكى و انتى عايشه
و ناسك حايقتلوكى لو لسه عايشه
و المسئولين حايجبروكى ترجعى مسيحيه غصب عنك
خوفا قال من الفتنه الطائفيه
لو يهودى و عايش بره اسرائيل
حاتتشاف كأسرائيلى غصب عنك
و لو فى بلد بتكره اسرائيل
و اسرائيل عملت حاجه وحشه فى الفلسطينيين
ممكن يحصل لك اللى حصلهم
و لو فكرت تحمى نفسك انك تعيش فى اسرائيل
اللى بيكره اسرائيل حايصوب عليك صاروخين
حتى لو انت يهودى مش مع اسرائيل
لو قولت انك ملحد فى بلاد الإيمان
انت كافر و تستحق الإعدام
علشان ربنا بيغفر الذنوب كلها إلا الكفر
يعنى لو سرقت و محدش عرف استغفر الله
و لو غلطت مع واحده و انت مش متجوز و محدش عرف استغفر الله
و لو غلطت مع واحده و انت متجوز و محدش عرف استغفر الله
و لو شاذيت و محدش عرف برضو استغفر الله
و لو تاجرت فى المخدرات و محدش عرف استغفر الله
و لو اغتصبت واحده و محدش عرف استغفر الله
و لو قتلت واحد بقصد و محدش عرف استغفر الله
بس قبل ما تستغفر الله
لازم تتوب توبه نصوحه
إنك ماتعملش ده تانى ابدا
و بعدها استغفر الله
و لو قولت طب مش عاوز ابقى مسلم
علشان مش عاوز يحصل لك كل ده
علشان مش عاوز يحصل لك كل ده
مش حايبقى عندك فرصه
لو كنت بعد فتره قررت إنك ترجع إلى الإسلام
طبعا بعد التوبه إلى الله
و طبعا بعد الإستغفار إلى الله
يبقى احسن لك إنك لو مؤمن بشىء
إنك تخفى إيمانك بهذا الشىء
لو عايز تعيش لهذا الشىء
لإن الزمن اللى احنا فيه قاسى
و الناس ما بترحمش
و الله غفور رحيم
Thursday, September 30, 2010
يليفط
لفطلا و
هلفطلا جاتن انا و
هتخا لفطلا ما و
اهوخا هلفطلا وبا و
هدج لفطلا وبا و
اهتتدج هلفطلا ما يقبى و
لفط جتني و هتنب كينى امل بالا و
هلفط جتنى و اهنبا نم كانتت لما مالا و
Saturday, August 21, 2010
يومين فى كايرو
من الاول و انا عامل حسابى انى انزل هوس و الا انتقد و الا اولول و الا الطم على حال البلد...انزل للمهمه المستحيله و ارجع هوس لاوروبا تانى...ما هو اصل كلامى مش حايغير فى حاجه...و الا ايه
يوم الجمعه بالليل...ماما و بابا و اخويه كانوا مستنيين فى المطار...اول لما شافونى فرحوا و حضنونى و باسونى...و بس...هوه ده كان اول و اخر حب حاسيته منهم
و انا راجع البيت الشوارع زى ما هيه...نورها ضعيف...عربيات عماله تبيب بيب...عيال بتنط ادام العربيه و هى بتعدى و بتقول ما تدسونى...شحاتين واقفين متربصين اول ما الاشاره تبقى حمرا يلزقوا فى ازاز العربيه منبى يا بيه...زهور اوروبا الجميلة
المهم وصلت البيت فى امان الله...العماره قذره زى ما هيه بس حاطوا اشجار بلاستيك زينه بواءت منظر المدخل...الاتنين البوابين جريوا على العربيه و قالوا افتحوا ضهر العربيه علشان نطلع الشنط لقوا ما فيش شنط...كنت جاى بشنطه هاند باك واحده بس شايلها فى ايدي...دخلت اوضتى بسم الله ما شاء الله...اكوام تراب فوق تراب...جبال من الاتربه اوح اوح كح كح هاتشو...ياااه...الكتب جنب بعضها زى ما سبتها...شرايط الكاسيت...اسطوانات الدى فى دى...هدومى عفنت تمام...الحيطه مخرمه كلها و فيها بواقى لزق من البوسترات اللى كانت زمان متعلقه...الساعه ما بتمشيش...و النور بينور خفيف...و الدنيا حر موت...ناس اوروبا المحترمين
ايه الحر ده...40...عمال اعرق و اعرق و اعرق...و تراب و عفره و عرق ...و عرق و عرق
يوم السبت اهلى كانوا عازمين العيله كلها على شرف قدومى من اوغوبا...و الطباخه بقه شغاله عماله تعك...جم الناس و سلموا عليه اكنهم لسه شايفينى من اسبوعين...نسيوا انى كنت اكتر من سنه متغرب فى الخارج...و دخلوا على البوفيه هم هم هم...و الكل يرفع شعار "اصل انا كنت صايم"...يا راجل...ما كانش ليه نفس اكل...للدرجه دى الاكل اهم منى...سبتهم ياكلوا و دخلت اصلى المغرب...بعد ما خلصوا اكل مااعرفش بدئوا يتلخموا ببعضيهم...العيال بقه عماله تجرى فى الشقه...و البيبى عمال يواء واء...و مرات خالى عماله ترضع...و جوز خالتى باطنه بتوجعه و قرفان من جسمه علشان بقاله فتره ما استحماش علشان هوه ساكن فى فيلله فى التجمع الخامس و يا حرام ماسوره الميه الرئيسيه اتكسرت و الميه مقطوعه بقالها ايام...تيته عماله تلعب بالحفيد الجديد...بابا ملخوم بتحضير الحلويات...و ماما بتعمل نفسها انها بتعمل حاجه مهمه...و خالو الوحيد اللى ابتدى يسألنى عن احوالى هناك فى اوروبا كانت عامله ازاى...اتبسط جدا و ابتديت احكيله و اجاوبه على كل سؤال...ما فيش بعد خمس دقايق قاموا يصلوا المغرب جماعه...بعدها قعدوا يعرقوا على نفسيهم و يقولوا فين يا عمونا التكيف...ازاى ما عندكوا تكيف...تق تق تق...امبوظى بيللى...الاوضه الوحيده اللى فى الشقه اللى فيها تكيف هى اوضتى...و طبعا اوضتى تراب بالهابوللى...دخلت اوضتى...و حشرت فى السريع هدومى و حاجاتى اللى مترميه على الارض فى الدولاب...و جبت اباجوره من الصاله علشان النور واطى حقير...و الناس ابتدت تهجم على اوضتى...و ابتديت اجيب كراسى من الصالون و احشر فى الاوضه...و الناس عماله تحشر نفسها فى الاوضه اللى اتملت على الاخر...و التكيف اللى نص حصان بقى ربع...و العرق اختلط بالتراب بالكلام بالسكر بتاع حلويات لو كارنفال اللى البسبوسه فيه بمتين جنيه مش عارف ليه...و العيل ماسك طبق الايس كريم معووج و عمال ينقط على السجاده و بيعيط...و انا بعيط معاه على السجاده...جو اوروبا البديع
زهقوا و عاوزين يتسلوا بحاجه…التلفزيون فى اوضه الوالده و ماينفعش نشيل الناس للتلفزيون أو نشيل التلفزيون للناس…رحت جايب اللاب توب بتاعى علشان افرجهم على التالافازيون…شافوا الاب توب قالوا لى طب ورينا بقى صور اوروبا…طبعا الصور محطوته فى اللاب توب سداح مداح…صور بنات على صور حاجات لا تناسب رمضان و صور للكبار فقط و الاطفال و الرضع فى الاوضه…كذبت و قولت له اصل الصور فى الهارد ديسك و لازم لسه اطلعهم و افرمتهم فى الاب توب و ده حاياخد وقت…أى كلام فى الهالوكش و الخباثه هو حد فاهم حاجه فى التكنولوبيا…دول فلاحين كامبايوطر ياض…المهم فتحتلهم قناه القاهره و الناس على النت و فوازير مريام العسوله و عرفت الهيهم من الحر و الطين اللى هو نتاج عرقهم مع تراب الاوضه...بنات اوروبا المزز
و بعد فتره وجيزه الناس زهقت و طلعت من هدومها…اللى نام بعد الاكل من التخمه على سريرى المترب…و اللى بربر…و اللى راح يتسير…و هوب كله عاوز يروح…يلا مع السلامه فى ستين داهيه تخدكم…قال اهل قال…انا ماليش اهل خلاص
يوم الحد نزلت الشارع الضهر رايح اشترى حاجه من مول الكمبيوتر…مالاقيتش رصيف…الرصيف و الشارع و مدخل العمارات حاجه واحده…قذاره ماليه الشوارع…ناس معفنه بشباشب مستوليه على المنطقه…و الفاظ تخدش الحياء...و الستات بقت بتقول احه عادى...و العربيات عاوزه تخبطنى…و الميكروباصات متهوره و السواقين متسحرين على قله…البلد زى ما هيه...سداح مداح...عك مزدوج...تقدمت بس قليلا للخلف...ما فى شىء اتغير يا ولدى...الناس بس بقت مبرشمه...و جلها خرس ليلى...يمكن علشان الصيام...بس لاحظت إن القروش النص و الجنيه زادوا اوى و مش لاقى مكان احطهم فيه فى جيوبى…و البيبسى الكانز بقت باتنين جنيه و نص بدل جنيه خمسه و سبعين…و التاكسيات البيضه فى حرب شرسه مع التاكسيات السوده...و لما روحت الجيم لقيت الشباب الفل لسه زى ما هوه قاعد يقول آه آه آه بقاله سنه على امل يطلعله عضلات ...و الجو مازال حر يقرف…و التكيف باظ من الحر…و الميه نازله من الحنفيه مغليه و بتقطع…رجعت البيت قبل الفطار و هيا بنا نأكل بواقى العزومه بتاعت امبارح...طبيعه اوروبا الخلابه
كلمت صاحبى انزل معاه بالليل لقيت بتوع الحى قطعوا النور على المنطقه…و الناس بتصلى التراويح فى سرها بعد ما فطرت فى الضلمه…قولت له ودينى حته نضيفه يا قدوره…قال لى بس لازم تكون فيها شيشه… ودانى رستوران وسخ قال عاوز 30 جنيه مينيمام شارج…شارج فى عينك…قولت له لأ ودينى حته تانيه…زهقته فى عيشته من كتر الحتت المعفنه اللى رفضتها…قولت له بص ودينى ماك اشترى ساندويتشات و اتسحر بيهم فى المكان اللى انت عاوزه…راح مودينى فى غرزه ورا جامع ملتقى بلطجيه المانتيآه...لقيته فتح ضهر العربيه و طلع خرطوم عامل زى خرطوم الجنينه…قال ايه علشات يشيش على نضيف…قال لى اصل مامى مش عاوزانى اجيب شيشه فى البيت…مانعه دخول الشيشه تماما…ربنا يهديها...بيوت اوروبا العريقه
يوم الاتنين كنا معزومين عند عمتى…برضو يعنى علشان الواد جه من الخارج…بس الصبح الاول قابلت ميكو فى النادى...بقاله سنه خاطب و مش عارف يتجوز...قعد يحكيلى عن اجتهاده و تضحياته علشان الجوازه تتم و مشاكل الشقه و العفش و الشغل بعد ما اتخرج... صعب عليه...بعدها روحت مع اهلى على فطار عمتى…قعدنا على السفره…الراجل ادن…ابتديت اشرب الشربه لقيت بنت عمتى بتصرخ آه حاولد…اصل هى حامل و الواد حبك وقت الفطار ينزل يفطر معانا…جوزها الفنان اللى كان قاعد جنبى كان حايخلف هو كمان…اصل ده اول مولود ليه… راح واقف و مصرخ "بينا على دار الفؤاد"…يا بابا احنا فى المعادى…دار الفؤاد فى اخر الدنيا…اصل الدكتور اللى بتتابع عنده التيم بتاعه اللى بيرتاح معاه فى دار الفؤاد…يا حبيبى انت عارف الصويت هناك…قصدى السويت هناك بكام…ما يهمش…البيبى حاينزل…هيا بنا إلى دار الفؤاد…أنا امى ضربت فى دماغها انها تقعد و تاكل و تحلى كمان…ابويه راح مع البنيه و امها و جوزها على دار الفؤاد…و حظهم الجنان الطريق اخد ساعتين علشان كان فى حادثه على الدائرى...جوز عمتى و بناته الاتنين كان لازم يقعدوا مادام امى خللت فى المكان…و انا البساط انسحب من تحتى…عزومه ما تمت...نو كومنت...طعام اوروبا اللذيذ
كلمت صحابى اللى بقالى كتير ما شوفتهمش…هاى ازيك فينك يا بنى مختفى ليه…لأ مش حاقدر انزل اصل عندى مش عارف ايه النهارده و مش عارف ايه بكره و معظوم بعده الخ الخ الخ…بس ابقى خالينا نشوفك…هاى ازيك يا باشا عاش من شافك…ممكن يبقى عندى معاد فاضى اخر الاسبوع…صاحبك ده خارج نطاق الخدمه…صاحبك ده غير موجود حاليا…صاحبك ده متابع جميع مسلسلات رمضان و الاعاده...و زعلت لما عرفت إن صاحبى الانتيم ايه واى فى ابوظبى...بس روحت قاعد فى البيت ادام التلفزيون اقلب فى القنوات مش عارف اتفرج على حاجه…كله زى بعضه…مالهوش طعم…و انا ماليش نفس…جالى اكتئاب…ارجع لاوروبا بتاعتك يا عم و ابقى خاليها تنفعك
صدمه ما بعدها صدمه… حاسيت اد ايه انا مش مهم فى الدنيا… فى اسرتى…بين اصدقائى… فى الحياه كلها…انا فعلا كئيب...الناس ملخومه فى نفسها…فى الحياه الصعبه فى مصرنا…الناس مش شايفه غير نفسها…الناس بقت انانيه…و انا كمان انانى…أو يمكن كنت شايف نفسى زياده حبتين…بس بجد…هو أنا غلطان لما اكون بحلم باستقبال حافل من الاهل و الاصدقاء…مش حافل يعنى بس اهتمام و لو بسيط عن احوال ولد متنيل شاب اعد طفح و اتغرب و اشتغل فى الخارج…ايوه انا غلطان…عمر ما جه يوم فى السنه اللى كنت فيها فى اوروبا و اتنرفزت...أو اتعصبت...أو ضغط دمى على...بقالى سنه ما عيطش...بس من اول ما جيت و كل يوم زعيق و خناق مع الوالد و الوالده...و ايه و احنا فى رمضان و ايام مفترجه...و امى فى لحظه غضب قالت لى يا رب تغور فى اوروبا و مترجعش ابدا ابدا ابدا...قالتها تلات مرات...حسيت انى حاموت فى الغربه...و يعنى لو مت حد حايهتم...و حاسيت إنى ضيعت وقتى و اجازتى على فشوش و حرقه الدم...يعنى اضرب نفسى ميت جزمه لو جيت مصر تانى…طب قول لى حاجه واحده حلوه فى مصر...ما كنتش فاكر ايجبت طظ حايبقى اسم على مسمى… صحيح… ويلكم واد باك و سهلا فى هوم كايرو