الكعبة الشريفه على بعد كيلومترات من منزلى...و بالرغم من ذلك لا اذهب إلى الصلاه هناك
المسجد اللى باصلى فيه الجمعه الآن بيبعد عن منزلى تقريبا ساعه بالعجله…و هو المسجد الوحيد فى المدينه...و بالرغم من إن الذهاب إلى صلاه الجمعه بالنسبه لى حاجه مقدسه…إلا إنى كنت خايف فى البدايه من ترك العمل بحجه الصلاه…مش عارف... الناس اللى فى الغرب ممكن يفهموها غلط…هروب من الشغل...فتره راحه...العمل له وقته و العباده لها وقتها...ليه ما تصليش بعد العمل...ولكن بالعكس...لم يسألونى فى أى شىء و الحمد لله احترموا رغبتى فى الذهاب إلى صلاه الجمعه و وافقوا على تركى للعمل لمده ساعتين اذهب فيها للصلاه ثم ارجع لأكمل العمل مره اخرى
المسجد كان مخزن لمصنع للخمر...و من ثمانيه سنين و انا لازم اصلى الجمعه فى المسجد ده لما اكون فى زياره للمدينه...و شاهدت المسجد ده بيكبر سنه بعد سنه و اصبح هناك عاملين فيه و مدرسه للأطفال و يعقد فيه الآن ندوات و دورات هامه
انا زى ما الواحد بيقول من البيت للمسجد و من المسجد للبيت عمرى ما كنت باحب اختلط بالناس اللى بيصلوا فى المسجد...مع إنى كل يوم جمعه باشوف نفس الوجوه بس زى المثل ما بيقول...كل ما تدى ضهرك للترعه...عمر البلهارسيا فى جتتك ما ترعى
من الأخر انا مع نفسى و ربنا و ماليش دعوه يا عم بحد
لحد ما فى يوم من الايام دخل المسجد ملاك
صلى صلاه تحيه المسجد و استمع لخطبه الجمعه و صلى معانا الجمعه و مشى
كل يوم جمعه فى لحظه دخوله من باب المسجد بالجلباب الأبيض اللى لابسه فوق القميص و البنطلون الجينز...الناس لمده لحظات لا تلتفت للخطيب اللى على الممبر و تبص على الملاك...الملاك يقول بهمس السلام عليكم و الكل فى المسجد يقول و عليكم السلام و رحمه الله و بركاته
لا يتكلم مع احد و لا احد يتكلم معه
و عدت اسابيع و شهور و انا اسأل نفسى مين الملاك ده...بيجى المسجد ليه...و هل بيفهم اللغه العربيه...و هل يستمع فعلا للخطبه... و هل هو من البشر
لما بيصلى باحس اكنها اخر صلاه حايصليها فى حياته...منتهى التركيز و الخشوع...اكنه من العالم الآخر...بالرغم من إنه بيصلى تحيه المسجد زى الناس التانيه اللى فى المسجد...بس صلاته شكلها مختلف...شكلها عباده...اما صلوات الناس التانيه فشكلها حركات جسمانيه روتينيه
الملاك اظن يسمى يوحانيس
بعض الشائعات تقول إنه جاسوس مدسوس من الدوله ليراقب كل ما يدور فى المسجد...و إنه بيفهم و بيعرف يتكلم عربى كويس...و إنه متدرب على إنه يمثل إنه مسلم بيصلى فى المسجد...و إن فى ملابسه جهاز لتسجيل الخطبه...و إنه عميل لدى اجهزه الأمن الاوروبيه للكشف عن الارهابيين...و علشان كده معظم الناس بتخاف تتكلم معاه و بتتجنبه من باب الحذر
أنا احساسى بيقول غير كده...ممكن يكون تعرف على الدين الإسلامى و اقتنع به و دخل الإسلام و بيصلى الجمعه زى أى مسلم
أو ممكن يكون لأب عربى مسلم و أم اجنبيه و علشان كده شكله اجنبى
مره صليت الجماعه جنبه و سمعته فى الصلاه و هو بيدعى بلغه عربيه مكسره
بعد صلاه الجمعه بيقعد يصلى و يدعى بس عمرى ما شوفته بيقرأ القرآن...و هنا تيجى نظريه إنه ممكن يكون ما بيعرفش يقرا عربى
باحس إن فيه طاقه غريبه و اقتناع و حب رهيب فى تأديه الصلاه ما شوفتهاش فى أى واحد تانى بيصلى فى المسجد...أكنه طفل جديد بيكتشف الصلاه لأول مره...و فكره الاتصال بالخالق سبحانه و تعالى...و مؤمن بالعباده اللى بيقوم بيها
مش عارف ليه أنا سعيد جدا إنه مسلم مؤمن...و حزين جدا إنى لا اهتم بباقى المسلمين العرب اللى فى المسجد...اكن عاوز الشعب اللى أنا عايش معاه الوقتى هو اللى يبقى مسلم بدل الشعب بتاعى اللى فى مصر
العرب اللى فى المسجد بيفكرونى بالأمه العربيه...بيصلوا بزهق فى المسجد...تعود...تأديه فريضه و خلاص...و أنا زهقت من زهقهم
لو الخطب اللى فى المسجد دى اتسجلت و اتزاعت...أنا حاخجل منها بالتأكيد...تضييع للوقت...اكن جبت المسجد التيك أواى اللى فى مصر و حطيته فى اوروبا
خساره...الإسلام عندنا بقى فى غساله فول اوتوماتيك...عمال يلف يلف يلف فى نفس الدوامه من غير نهايه...و يوحانيس اكنه فيرجن جديد من الإسلام...نسخه نظيفه من الإسلام من غير فيروسات...كل ما الإمام يتكلم نفسى اقوم و اروح ليوحانيس اسد ودانه من الكلام الرجعى و الهدام اللى بيتقال بإسم الإسلام...و ساعات اتمنى إنه ما يكونش بيفهم عربى علشان ما يسمعش اللى بيتقال من على الممبر...و كل يوم بقيت ابص اطمن هل يوحانيس جه المسجد و الا لأ...أنا لو لسه داخل فى الإسلام و سمعت الكلام ده و شوفت تصرفات العرب اللى فى المسجد اسيب الإسلام عالطول
نفسى اتكلم مع يوحانيس و اقول له عن الإسلام الحقيقى...دين الرحمه و المغفره و تقبل الآخر...دين الأخلاق و القيم و المحبه و الأخوه و الوسطيه...مش طول الوقت إمام مختلف يطلع يتكلم من على الممبر و يقول إننا فى بلاد الكافرين...و ربنا يسفك بيهم الأرض و ييتم اطفالهم...إمام متشدد فى كل التعاليم الإسلاميه...إمام بيحسسنى إن دين الإسلام دين من عصور الجاهليه
ليه ما اتكلمتش مع يوحانيس...هذا هو السؤال
أنا باحمد ربنا إنى اتولدت مسلم...و إنى عايش فى مصر علشان كل فتره باشتاق إلى البيت الحرام...و لكن تأتى اللحظات التى اود فيها أن أكون اجنبى ملحد آمن و دخل فى الإسلام
و من يوم الجمعه اللى فات و يوحانيس ما جاش
مرت شهور و ما فيش حد جديد بعد يوحانيس دخل المسجد...و اتوقع إن مافيش حد حايجى بعد إيمان يوحانيس من اليوم
