The Third Egyptian Revolution

 الف مبروك على ضياع مصر... مشكلتنا كلام كلام كلام و ما فيش فعل…البلد حالتها زفت و الجنيه ما بقاش له قيمه  و اصحاب الرأى فى السجون و الشجر و الخضار فى البلد اتشال و الاسمنت و الخرسانه اتحطت و املاك الوطن بتتباع و انتشر الفساد فى الارض و المجاعه و حاجه قرف…كل شويه مش عارف مين الفنانه دى بتشم مخدرات…و رجل الاعمال مش عارف ايه عمل مصيبه ايه…و دار الايتام دى عملت ده… و مسكنا ايه فى المطار…و واقعه البرغوت…و واقعه عروسه البحر… و ماتش الكوره انتهى على كام…كيف نلهى الرأى العام و خلاص… ما العالم كله متنيل زينا...عك عك عك…ما فيش تعليم…ما فيش صحه…كل رجل فرخه احسن…و الراجل عمال فى الفيلم بتاعه انا الرسول انا عارف احسن منكم انا المنقذ عاوزين صبر انا ربنا معايه...سيبوا الفلوس عليه...بس عاوز منكم تصبروا سته شهور إلى الابد … انا صريح معاكم… انا انا انا… امراض نفسيه نرجسيه عصبيه و الله

و فيلم 11/11 مانزلش…بالرغم من الدعايه الجامده للفيلم… علشان عارفين انه مش حايجيب ايرادات…زى فيلم 25/1 و فيلم 30/6 … كله كان على الفاضى و جه بخساره كمان

لما الورم يبقى منتشر فى الجسم…خلاص ما فيش علاج للسرطان…لازم الانسان يموت

نصيحه من ولد شاب لولد شاب او بنت شابه او رجل عجوز او ست بيت… اطلعوا بره البلد دى… ارض الله واسعه…الدنيا بره مش جنه بس على الاقل فيه بره امل ان الواحد يعيش احسن…الواحد حايعيش كام مره…فيه بلدان كتيره بتستقبل لاجئين… مشكلتنا ان كل واحد حايقول… طب اهلى اسيبهم…طب ولادى…طب صحابى…طب بتاع الكشرى اللى بحبه… و بتاع الكبده اللى بعشقه… طب بره برد…بره ناس سقعه كيك… بدون مشاعر و الا احاسيس… طب المسلسلات… طب الشيشه و القهوه اللى على الناصيه…. طب السحابه السوده…طب اخد الشطاف معايه... اخرج بس من البلد دى و حاتلاقى فى حته تانيه برضه ناس و اهل و اصدقاء و بتاع كبده و مخ كمان… بس اعمل الخطوه دى و البس جلبيه…ناخد بالاسباب و مانرميش نفسنا الى التهلكه و الحبس و البهدله

هوه البلوج ده اسمه ايجيبت طظ ليه… علشان طظ فى مصر… احنا زارعين فينا انت تبقى جاسوس لو خرجت من مصر… انت تبقى خاين لو تخليت عن جنسيتك المصريه…انت تبقى كافر لو رحت للكفار فى بلاد الكفره…هبل و الله…بطيخ…ملوخيه…باميه….ما حدش عاوزك تبص بره الصندوق…ما حدش عاوزك تتفكر لو دينك ده الحقيقه…ما عاوزك تفكر لو انت عايش فى عالم موازى

رسل و انبياء كتير هاجروا بسبب زى اللى بيحصل عندنا ده…هوه اللى بيحصل عندنا ده يرضى ربنا

و الناس اللى عايشه بره زيى كده ايش دخالها فى امور مصر و المصريين… ما تعيش يا اخى مبسوط فى بلاد الفرنجه و سيبنا نعيش…عمال بس تقوم الناس و تعمل بلبله على الفاضى…اكيد وراك ناس و اغراض مسوسه … ربنا يحفظ مصر من امثالك اتفو عليك و على اللى خلفوك…اخرس يله

خلاص خرست

ثوره ما تمت

I might see #EgyptianRevolution trending #Jan25 in cyber space, but not in real life.
— WS (@egyptoz) January 22, 2011

المشهد المصرى قبل ثوره 25 يناير:

السواق: يلا يا محمد...البيه نازل...البيه نازل

البواب يجرى و يفتح باب الاسانسير

البيه يطلع بالنضاره السوده و يمشى مسرعا تجاه باب العماره

البواب: صباح الخير يا سعادة الباشا

البواب يعمل تعظيم سلام

البيه بيدخل ايده في جيب جاكيت البادله و بيطلع خمسين جنيه جديده طازه من البنك...و يعطيها للبواب من غير ما يبصله

البواب يلهف الخمسين جنيه و يبوسها و يبوس ايد البيه و يقول خمس ادعيه للبيه مثل الله يبارك في اولادك...ربنا يكرمك كمان و كمان

البواب يجرى للعربيه و يفتح باب العربيه المرسيدس للبيه و يعمل تعظيم سلام تانى و يجرى لشباك العربيه و يمسحها بقطعه خيشه و ميه

العربيه المرسيدس تترك المكان و البواب يقول بصوت خافت: الله يخرب بيت ام اللى جابوك يا حرامى يا ابن الجزمه

المشهد المصرى خلال ثوره 25 يناير:

ثوره 25 يناير ثوره صدفه...الشعب ما فكرش يعمل ثوره و لا جهز نفسه لثوره و لا كان في باله اى ثوره...الشعب لقى نفسه فجأه في ثوره و قال يلا نشارك في الثوره...مالدنيا بايظه بايظه و احنا في الأول و في الاخر ميتين مش عايشين

بالرغم من ان ثوره 25 يناير من مبادئها عداله اجتماعيه و عيشه كريمه انسانيه للمواطن الغلبان البسيط الخ الخ الخ...إلا إن سبب تفجرها اساسا هو الأسلوب الوحشى غير آدمى للداخليه في معامله المواطن المصرى...و خالد سعيد كان رمز...و لولا صوره الشهيد خالد سعيد اللى اثرت على ناس كتير...و لولا الفيسبوك و التويتر...ما كانت الثوره اشتعلت من أساسه

الثوره كانت من البدايه مظاهره زى كل المظاهرات اللى كنا بنشوفها كل يوم أمثال كفايه الخ الخ... و لولا موقعه الجمل و موت الكثير من اهل المنطقه...و فكره احنا مش اقل من تونس... ما كانتش الناس أصرت انها تاخد حقها و حق دم أولادها اللى ماتوا في الموقعه

و بسبب إصرار حسنى مبارك على الرئاسه...كان إصرار الشعب اكبر على ازالته

المشهد المصرى بعد ثوره 25 يناير:

و لا استبعد انه كانت هناك ضمانات على عدم ملاحقه حسنى مبارك قانونيا و إلا ما كانش راح شرم الشيخ

و لا استبعد إن حتى لو كان حايتحاكم...قالوله نهدى نفوس الشعب اللى بتغلى بس و نعمل مسرحيه المحاكمه و اقعدلك سنتين في سجن خمس نجوم و بعدين نطلعك

و لا استبعد الإصرار على عمل الانتخابات الرئاسيه قبل الدستور علشان الأحزاب ما تلحقش تلم نفسها و يكون فيه فرصه اكبر للاخوان لفوز مرشحهم و إن الجيش يحفظ نظره الشعب ليه بعد إخفاقات المجلس العسكرى... و تنسى إن طنطاوى ساند مبارك طوال السنين اللى الفاتت

و لا استبعد إن فوز مرسى كان بسبب كيس الزيت و السكر و الرز و تشعب الاخوان في نجوع و محافظات مصر و اقتناع الغلابه إن الراجل ده مسلم و بدقن و بيعرف ربنا...و اكيد احسن من شفيق ابن الفلول

ولا استبعد إن موت عمر سليمان نور اللمبه اللى في دماغى

المشهد المصرى قبل ثوره 30 يونيو:

الكل يعلم إن الاستبن طلع فعلا استبن و إن الفجع بتاع الاخوان على السيطره على كل تروس مصر... و الرغبه في الانتقام بعد سنوات طويله من الملاحقات و التعذيب و السجون...و صلاحيات الرئيس البلهاء و الإعلانات الدستوريه اللى كانت نازله علينا عماله ترف...و الهمبك بمبك بتاع سياسه الاخوان...و غلاء الأسعار و الشلل المرورى و نسيان حقوق المواطن الغلبان و الدرنك اللى بيروح السجن لو دريفينج...و احنا هدفنا حضارات فرزس حضارات...كانت أسباب إن الشعب يقول كفايه حرام

و لا استبعد إن برنامج البرنامج لباسم يوسف كان ليه دور كبير جدا في توضيح المشهد المصرى للمواطن المصرى آن ذاك و أدى في النهايه إلى تفجر الثوره الثانيه

المشهد المصرى خلال ثوره 30 يونيو:

و لا استبعد إن تدخل الجيش في مسانده الثوره الثانيه وعدم مسانده أمريكا للثوره و احنا لو عملنا ثوره ممكن نعملها تانى و عاوزين ننجز قبل رمضان أدت في النهايه إلى خطف مرسى و إعلان فوز أراده الشعب

و لا استبعد إنه كانت هناك صدامات خفيه بين الجيش و الاخوان قبل الثوره الثانيه اسرعت باشتعالها للتخلص من الاخوان

المشهد المصرى بعد ثوره 30 يونيو:

إصرار الاخوان على رجوع مرسى كان بسبب ظنهم إن أمريكا و أوروبا ستساندهم بأسم حمايه الديموقراطيه و محاربه انقلاب الجيش

و عدم فض اعتصام رابعه بالقوه كان بسبب الآمال بأن تؤدى مفاوضات البرادعى و الاخوان بمساعده أوروبا إلى الخروج من الازمه عن طريق ضمانات عدم ملاحقه قانونيه للاخوان

و بعد فشل المفاوضات و الخوف من إن الاخوان يزدادوا مع الوقت قوه و صلابه قرر اللى قرر فض الاعتصام بالقوه و مات اللى مات

و علشان البرادعى شعر إنه اطرش في الزفه و إن ضميره امام ربنا اهم بكتير على إن العالم كله تقول عليه خاين و عميل للامريكان قرر إنه يستقيل علشان دم اللى ماتوا ما تبقاش في رقبه مسئوليته يوم الدين

 و عمرو موسى طلع ناصح و قال لك انا مش مع حد...و بلاها رئاسه و وجع القلب

و علشان الناس اتعلمت من الدرس...قرروا يعملوا الدستور المره دى قبل الانتخابات الرئاسيه

بس ما اتعلمتش الدرس و جابوا رئيس و وزراء على المعاش

و مرسى و اخوانه دخلوا القفص علشان يتحاكموا

و باسم يوسف و البرنامج اتوقف علشان بينقد بضحك على حامى الثوره الأكبر

و الشباب اللى فجروا ثوره 25 يناير اتمسكوا و اتحاكموا علشان مش عاوزين البلد تمشى

و اللى ماتوا من الجيش في سيناء بسبب الاخوان...و انفجرت قنابل يمين و شمال بسبب الاخوان...و واحده خلعت جوزها بسبب انه اخوان...و اللى كان مربى دقنه موضه حلق الدقن بسبب الاخوان...و اللى كان مسلم نص نص بقى ملحد بسبب الاخوان...و الجزيره و قطر و تركيا و حماس و امريكا و اوروبا كلهم اعداء و اخوان في اخوان

الاخوان عارفه إن مش من مصلحتها إن يحصل تفجيرات و اغتيالات الخ الخ علشان ده حيبوظ نظره الشعب المصرى ليهم... فأكيد مش حايزيدوا الطينه بله

و التانيين عارفين إن العمليات الارهابيه و نسبها للأخوان حيقضى على مستقبل الاخوان السياسى و حايزيد من فرص تمسك العسكر بحكم مصر

كل اللى في مخ المواطن المصرى حاليا هو القضاء على الاخوان ...علشان الاغتيالات تنتهى...و التفجيرات تتوقف...و الأمان ينتشر في ربوع مصرنا الحبيبه

الناس نسيت اننا عاوزين تعليم...عاوزين صحه...عاوزين اكل و شرب...عاوزين نشتغل بقه و ننتج...عاوزين نهضه...لأ بلاش كلمه نهضه علشان بتفكرنى بمرسى

السيسى مش رئيسى:

الاخوان بقت الجماعه الارهابيه...و مين يقدر على الجماعه الارهابيه إلا السيسى رئيسى...و تسلم الايادى

انا شايف كميه نفاق جماعى لا تنتهى من وقت السيسى رئيسى...بتفكرنى بأيام مبارك

ما هو الناس المتربيين تلاتين سنه على ايد مبارك ما اختفوش من يوم و ليله...النهارده عندهم مبارك تانى يعلقوا صوره في الشوارع و يرصفوا الشارع ليه بزرع و ورد و يألفوا له اوبيريت احنا اختارناك

كفايه إن فكره... لو السيسى نزل الانتخابات حايكتسح الكل... تؤكد عدم نزاهه الانتخابات...لعدم وجود مناخ ديموقراطى للمنافسه العادله...و علشان اللعب يبقى قانونى ننزل عنان ضده...و لو صباحى نزل يبقى راجل 

الداخليه مش من مصلحتها انها تتنقى...مين عاوز فيهم يتمسك و يتحاكم على اللى فات

و ايه اللى يربط الداخليه بالجيش...ملفات قديمه لم تفتح بعد؟

كل الرؤساء اللى حكموا مصر من بعد الملك كانوا من الجيش...من ناصر للسادات لمبارك

هل الشعب المصر متعود ان يبقى ليه فرعون؟

و هل الشعب المصرى عارف انه هوه اللى بيولد فرعون بنفسه؟

انظر إلى مبارك ايامه الأولى و قارن بينها و بين مبارك في أيامه الاخيره في الحكم

و مش عارف هوه ليه كل حزب عمال يتخانق على حكم البلاد...هل خوفا على المحاسبه...مش ناسيين إن فيه يوم حساب؟

احنا زهقنا من حكم الملوك و العسكر و الداخليه و الاخوان

احنا عاوزين رئيس مدنى...حاكم شاب عادل واعى و حكيم شغلته السياسه...مش جيش و مش شرطه و مش رجل اعمال و مش خلافه دينيه...حاكم عارف إنه بيشتغل للشعب...مش الشعب بيشتغل عنده و بيخاف منه

قول لى بقه مين يقدر ينتقد السيسى؟

لو السيسى بقى رئيسى ده حيؤيد نظريه الانقلاب العسكرى

لو السيسى بقى رئيسى مش بعيد اغير اسمى لبنت شابه و الموقع لايجيبت ام الدنيا

لو السيسى بقى رئيسى ده حيؤدى إلى اكتمال الحلقه المفرغه و اعاده المشهد المصرى إلى ما قبل ثوره 25 يناير

...اللى هوه انظر اول الموضوع

الشعب يريد اسقاط النظام

اللامركزية المصرية

واحد بعد الثوره قال لى : مصر عمرها ما حاتتصلح...عارف ليه؟ علشان كل واحد بيبص على مصلحته و مش مصلحه البلد

لما بيطلع حاليا احكم مرشح رئاسى مصرى فى التلفزيون و يسألوه إيه أول و أهم حاجه عاوز تهتم بيها و تغيرها فى مصر أول ما تمسك الحكم بيقول التعليم و الصحه...و دول فعلا اهم حاجتين احنا لازم نهتم بيهم فى اى بلد فى العالم علشان تنهض...و لكن للأسف معظم المرشحين بينسوا موضوع اهم منهم و هى اللامركزيه... اللى من غيرها و الا التعليم و الا الصحه تنفع تتصلح يا بيه

و أنا علشان كنت عايش زمان فى بلد فيها مركزيه و هى مصر و حاليا عايش فى بلد فيها اللامركزيه...حاسيت بالفرق الكبير اللى ممكن يعمله مفهوم بسيط جدا زى اللامركزيه

بالبلدى كده المركزيه كلنا تقريبا عايشينها فى مصر و حاسين بيها... الواحد يسألك انت رايح فين تقول له رايح مصر و انت فى مصر...طبعا انت رايح القاهره... تقريبا كل المصالح الحكوميه موجوده فى مصر...قصدى القاهره...و السياسيين المهمين عايشين فى القاهره...و الفنانين عايشين فى القاهره...و المثقفين و الكتاب و الوزراء برضو فى القاهره... السفارات و المصالح الحكوميه كلها فى القاهره...لو عاوز تختم على ورق روح القاهره...لو عاوز تقضى مصلحه برضو القاهره...لو عاوز تتعالج روح القاهره...الجامعات العريقه فى القاهره...المدارس الفوق محترمه فى القاهره...المتاحف المهمه فى القاهره...مصر هى القاهره و القاهره هى مصر...لدرجه إن الجيزه بيقولوا عليها برضو القاهره

هل مره جه على زهن التلفزيون المصرى أو القنوات الفضائيه المصريه إنها تجيب خبر عن دمياط أو طنطا؟ طب المنيا أو اسيوط؟ الوادى الجديد أو اسوان؟ الفيوم أو كفر الشيخ؟ احذروا... حمار بنى سويف شخ فى وسط الشارع ...كشرى عم احمد فى حاره حسحوس فى كفر حكاكه بيجيب تسمم...مدرسه الشهيده جملات فى صفط عرق سوس محتاجه ملاعب تنس جديده

اصل الناس اللى عايشين هناك مش مهمه...الناس اللى عايشين فى القاهره همه المهمين...الناس فى الحتت النائيه دى اللى بيقولوا عليها محافظات ناس فقيره...بيئه...تعليمها على قدها...بصراحه كده صعايده و فلاحين...خليهم ورا الجاموسه و الترعه و كفايه عليهم كده...دول ولا يفهموا فى البيض و الا فى البسكويت...دول ما يعرفوش حاجه عن حقوق الانسان...مصر هى القاهره و القاهره هى مصر

عاوز تشوف خريطه مصر الحقيقيه...انظر هنا

انت عارف اسوان و الاقصر و الاسكندريه و شرم الشيخ و الغردقه و الحتت السياحيه التانيه دى...ايوه نهتم بيها و ننميها...مش علشان الشعب المصرى اللى عايش هناك...المصرى و الا يساوى نكله...إحنا نعمر الحتت دى علشان الاجانب...اللى بييجوا من بلاد بره و معاهم فلوس و حريم و الذى منه

طب فهمنى يعنى اللامركزيه دى تبقى ازاى يعنى؟

نمسك مثلا مجمع التحرير...اللى ناس بالملايين رايحه و راجعه يوميا من عنده...علشان تقضى مصالحها و مصالح عيالها...لو المجمع ده مثلا شلناه من وسط التحرير و رميناه فى حته مقطوعه فى الصحرا بعد مرسى مطروح...هل حد حايروح هناك علما إن ما فيش اى وسيله اخرى تنفع غير إنك تروح المجمع ده علشان تقضى مصلحتك؟

طبعا حاتركب اتوبيس و تسافر و تقضى مصلحتك و يقولولك ناقصه الورقه الفلانيه و بعدين تروح تموت نفسك من الأهره...بس فى الاخر إنت اللى روحت برجليك

من النهارده كل الناس لازم تسافر إلى ما بعد مرسى مطروح علشان تقضى مصالحها...طب التحرير حصله ايه...بقى ما فيهوش صريخ ابن يومين...ميدان التحرير فاضى...المواصلات فى المنطقه دى اتحسنت...الناس اعصابها ارتاحت و هكذا...بس دى اللامركزيه العك ملوخيه

طب لو ودينا مجلس الشعب إلى ما بعد اسوان...مجلس الشعب حايبقى فاضى؟ ما حدش حايرشح نفسه فى مجلس الشعب؟

و مجلس الشورى وسط سيناء؟ و سيتى ستارز فى الوادى الجديد؟ و مبنى التلفزيون فى سفاجا؟

تخيل معى ايها المصرى فانتازيا لاند...عاوزين نقلل الزحمه و الاختناق و العشوائيات اللى فى القاهره فروحنا بنينا عمارات مخيفه فى منطقه مهجوره تسمى التجمع الحداشر...حته كده بعد التجمع الخامس...طبعا من غير و الا ميه...و الا نور...و الا سوبر ماركت... و الا مجارى...و الا مواصلات...و الا مدارس...و الا مستشفيات...و الا عيادات و الا و الا...إلا السلعوه و البلطجيه و مغتصبى النساء...حد حايحب يروح يعيش هناك؟

طب أنا بقيت رئيس الجمهوريه...قررت انفذ اللامركزيه صح...عملت ايه...بص معايه...أنا عملت زى خمس أو عشر اقاليم داخل مصر...و جوه كل اقليم برضو خمس أو عشر دويلات...مثلا اقليم هاكون جواها كفر الشيخ و الدقهليه و القليوبيه و الغربيه و المنوفيه و الشرقيه و طنطا...الدويله الرئيسيه لهاكون هى طنطا...بمعنى ده اللى حايكون عايش فيها رئيس هاكون...رئيس اقليم هاكون مسئول بس عن دويلات هاكون بس مش مسئول عن الدويله طنطا...و كل دويله حايكون ليها رئيس...رئيس رئيس الاقليم هو رئيس مصر...رئيس رئيس الدويلات هو رئيس الاقليم...كل اقليم له سياده خاصه فى امور و سياده مشتركه مع رئيس الجمهوريه فى امور اخرى

 كيف يستفيد المواطن الغلبان اللى عايش فى دويله القليوبيه؟

المواطن القليوبى حايبقى عنده قوانين خاصه بالبيئه المحيطه بيه و قوانين عامه للجمهوريه ككل...تلفزيون خاص يهتم بالدويله بتاعته...لغته الخاصه...معتقداته...مذاهبه...طقوسه...المرافق و المستشفيات و المدارس و الجامعات و المعاهد التعليميه و المكتبات الثقافيه الخ الخ حاتصمم لخدمه دويلته فقط...فرئيس دويلته حايركز مجهوداته للنهوض بهذه الدويله فيما يفيد شعب الدويله فقط...و رئيس الاقليم حايتابع و يراقب ما يفعله رئيس الدويله...اما رئيس الجمهوريه فسوف يراقب رئيس الاقليم و ليس رئيس الدويله...و هذا يعيق بالطبع الانفراد بالسلطه و يقلل الاعباء على رئيس الدوله...و بهذا تنفذ القرارات المتخذه من جهه رئيس الدويله بسرعه و دقه و تميز...و تشجع المواطن القليوبى على المشاركه الفعاله فى النهوض بدويلته...و تحل المشاكل الخاصه بالدويله بسرعه و حنكه لمعرفه رئيس الدويله و افراد سلطته بطبيعه دويلته و ادق تفاصيلها...و الامن القومى حاينتشر فى جميع اركان الجمهوريه بالتساوى...و اموال الدوله توزع على الاقاليم و الدويلات بالتساوى... و يكون هاكون متطور اقتصاديا و اجتماعيا و ثقافيا و صناعيا و زراعيا و تجاريا...علشان كل اقليم له الوزراء و العاملين المخصصين فقط لخدمه هذا الاقليم و دويلاته فتنهض مصر ككل و يستفيد كل مواطن دمنهورى كان أو عريشى كان أو اسمعلاوى كان...و يبقى زى ما المواطن القاهرى مهم لدولته...المواطن القليوبى برضو مهم...و المواطن الغردقى...و المواطن الدهبى

المشكله بقى يا حبيبى...إن لو رئيس دويله أو رئيس اقليم شرير قرر إنه يتخطى حدود صلاحياته و قرر يستقل باقليمه أو دويلته و بذلك تبدأ الكارثه و تتفكك الجمهوريه اقليم ورا اقليم...يعنى مثلا العلمانيين يقرروا يعملوا دولتهم الخاصه...أو الاسلاميين...أو الاقباط...أو النوبيين...أو البدو...و هكذ تضيع مصر برمتها و السلام عليكم و رحمه الله و بركاته

The Islamic Republic of Egypt

كفايه عشر سنين عذاب...عشر سنين رعب..عشر سنين إرهاب...كل ده بإسم الإسلام...جمهوريه مصر الإسلاميه اصبحت جزيره معزوله عن العالم يا ناس...بعد الهجره الجماعيه للمسيحيين من مصرالسنين اللى فاتت...و الهجره الغير شرعيه من المصريين إلى الدول العربيه المجاوره... بعد قرار منع السفر من مصر إلى بلاد الكفار...تعالوا ننادى برجوع جيشنا المصرى من افغانستان و فلسطين و باكستان و انهاء برنامج "سبيل" (مجاهدى الإسلام لتحرير ارض الله المستعمره)...و ننادى برجوع الثقافه و التنوير...فاكرين لسه موقعه حرق الاقمار الصناعيه و سينمات القاهره و الاعدام الجماعى للمثقفين والفنانات... تعالوا يوم الأحد القادم ننادى بوقف تدمير و تخريب اثارنا الفرعونيه...تعالوا نرجع متاحفنا و فنوننا العريقه...الموسيقى و الغناء... تعالوا ننادى برجوع الإعلام بعد منع القنوات الفضائيه و اجبارنا على مشاهده قناتى الإسلام الأولى و الثانيه...و رجوع الإنترنت و التليفون المحمول و وسائل الاتصال الحديثه...تعالوا ننادى برجوع العلم و التعليم...الصناعه و الابتكار و التطوير

يا جماعه عاوزين إن شاء الله الأحد القادم يكون أحد الانتصار...أحد الحريه...زى ما شباب الجيل اللى فات من عشر سنين ما عرف يشيل نظام ديكتاتورى فاسد...احنا شباب النهارده نقدر برضو نحقق المستحيل و نحرر مصر من الامبيز

فاكرين زمان بعد ثوره 25 يناير عام 2011 لما انتشرت حالات الاغتصاب و الإنحلال الاخلاقى و البلطجه و العنف و القتل و الإضرابات و الإعتصامات و طلعوا الامبيز يقولوا إن ده بسبب بعد الشعب المصرى عن دين الله و هذا غضب من الله و يجب تطبيق الشريعه الإسلاميه لحمايه ابناء مصر...و الشعب المصرى الغلبان بعدها من لهفته للإستقرار و الامان اقتنع بالكلام ده و اعطى صوته للخلافه الإسلاميه...النهارده و بعد تقريبا عشر سنين بنقول يا ريت اللى كان ما كان...زمان وقتها الشعب كان طالع من ديكتاتوريه ما جربش الديمقراطيه...و خاف يجربها علشان افتكر إنه لو ديمقراطى يبقى بيخالف شرع ربنا...الامبيز انتهزوا الفرصه و غسلوا عقول الشعب المصرى الطيب...و وعدهم بجنه الله على الارض...لم يعلم الشعب المصرى حين ذاك أن الديمقراطيه تعطى الحق للمسلم المتدين زى المسيحى و الملحد إنه يمارس شعائره الدينيه كيفما شاء فى حدود الدستور الذى من بمادئه حمايه حقوق و حريات كل فرد فى هذا الوطن...و لكن الامبيز تخيلوا انهم جنود الله فى الارض...و إذا خالفت رأيهم فإنك تخالف الله...و لم يرضوا أن يكون الإسلام دين بين العبد و ربه... و لكنهم صمموا على أن يجعلوا الإسلام علاقه شعب كامل بربه...و لم يفهموا أن لو كان الله يريد العالم كله إسلامى...لكان جعل شعوب العالم اجمع مسلمين ملتزمين...فلا مجال للمناقشه أو الإعتراض أو إبداء رأى أو فكر آخر ...و ها نحن نعيش الآن تحت حكم الديكتاتوريه الإسلاميه...مجبرين على إن نمارس حياتنا كيفما شاء الامبيز...وإلا نعاقب حتى الموت  

تعالوا نرجع حق مروه...دم مروه ما رحش هدر...مروه اللى اجبرت على الزواج... مروه اللى كانت تبحث عن الحريه و هربت من بيتها و اتهموها بالخيانه و الزنا بعد القبض عليها على الحدود جمهوريه مصر الاسلاميه و جنوب مصر...و تم رجمها حتى الموت يوم الجمعه الحزين...الاحد اللى جاى عاوزين نقول بصوت عالى كلنا مروه...كلنا مروه...عاوزين كل مرأه ترجع تعيش من تانى

يلا يا شعب مصر نحرر مصر...مصر أم الدنيا... تعالوا نرجع المرأه إلى الشارع...و نرجع كل حقوقها الممنوعه...من اجل حياه كريمه لأمى و أمك...أختى و أختك...بنتى و بنتك... يلا نحرر المرأه من النقاب... نرجع حقها فى التعبير و العمل و قياده السياره...حق المرأه فى الإنتخاب...حق المرأه فى إختيار شريك الحياه
 

تعالوا ننهى بحور الدماء فى التحرير بعد جمعات قطع الايادى و الجلد و جمعات الرجم حتى الموت...و اجبارنا على مشاهده تطبيق الحدود مباشره بعد كل صلاه جمعه...تعالوا نحمى براءه اطفالنا و مستقبل شبابنا من تجنيدهم فى جيش الإسلام للجهاد فى سبيل الله...نرجع حق الإنسان فى العقيده...حق الإنسان فى العباده... يلا نرجع تعليم البنات بجانب الولاد فى المدارس و الجامعات... نرجع حق رجوع المسيحيين الاقباط المصريين من الخارج... و نرجع السياحه تانى لمصر... وعلشان تعرفوا اخر تطورات ثوره الحريه شغلنا تلات مواقع واى فاى سريه

واى فاى القاهره الكود السرى للموقع 354 795 457

واى فاى الاسكندريه الكود السرى للموقع 759 307 295

واى فاى السويس الكود السرى للموقع 274 694 953

و كمان شغلنا خاصيه الإن اف سى اللى ممكن من خلاله الابلاغ عن تحركات ضبل بيفى فى يوم مليونيه الأحد المقبل إن شاء الله

يلا نوحد جمهوريه مصر الإسلاميه مع جنوب مصر و سيناء

و نغير اسم جمهوريه مصر الإسلاميه إلى مصر

و نغير مصر من دوله دينيه إلى دوله مدنيه...فالدين لله و الوطن للجميع

و نلغى الخلافه و نمكن المصريين من حقهم فى التصويت لإختيار رئيس لمصر

و نعطى حق الترشح فى الانتخابات الرئاسية دون قيود تعسفية و نقصر حق الترشح للرئاسة على فترتين على ألا تزيد الفتره عن 4 سنوات

و ننهى هيئه الامر بالمعروف و النهى عن المنكر (بى فى بى فى) فورا

و نطلق حرية تكوين الاحزاب علشان يكون النظام السياسى فى مصر على اساس تعدد الاحزاب السياسيه فى إطار المبادىء الأساسيه للمجتمع المصرى و نمنع قيام أى حزب فى مبادئه او برامجه أو نشاطه على اساس دينى أو طبقى أو طائفى أو فئوى أو جغرافى أو التفرقه بسبب الجنس أو العقيده أو الأصل

و نجعل الرقابة على الانتخابات من قبل منظمات المجتمع المدنى و المحلى و الدولى

و نطلق حرية الاعلام و نفتح باب حرية التعبير عن الرأى بكل صورة و نكفل حق تكوين الصحف و اطلاق الـ

تم حجب الموقع من قبل هيئة الأمر بالمعروف و النهى عن المنكر

للإبلاغ من خلال حملة "أمننا فى إيماننا" إرسال تلغراف إلى مكتب الإداره العامة للتوعية و التوجيه - شارع عبيد الله بن كعب بن مالك

الأمر بالمعروف والنهي عن المنكر هو الذي بعثت به الرسل والمقصود تحصيل المصالح وتكميلها وتعطيل المفاسد وتقليلها بحسب الإمكان .

 فإذا كان الأمر بالمعروف والنهي عن المنكر مستلزما من الفساد أكثر مما فيه من الصلاح لم يكن مشروعا وقد كره أئمة السنة القتال في الفتنة التي يسميها كثير من أهل الأهواء الأمر بالمعروف والنهي عن المنكر فإن ذلك إذا كان يوجب فتنة هي أعظم فساداً مما في ترك الأمر بالمعروف والنهي عن المنكر لم يدفع أدنى الفسادين بأعلاهما بل يدفع أعلاهما باحتمال أدناهما كما قال النبي صلى الله عليه وسلم "ألا أنبئكم بأفضل من درجة الصيام والصلاة والصدقة والأمر بالمعروف والنهي عن المنكر قالوا بلى يا رسول الله قال إصلاح ذات البين فإن فساد ذات البين هي الحالقة لا أقول تحلق الشعر ولكن تحلق الدين."

#Jan25

Update 11.02.2011 6:02 PM