الدرجه واحد تحت الصفر

-->

انا السحب البيضه بتدخل من شباك الاوضه...وااااو...كوول...و لا فى الاحلام

منظر رهيب...كنت لازم اقف و اقول سبحان الله

بررر ثم بررر ثم برر...ما هذا يا شانكيزلانك...انه الصقيع يا ولدى

بس لأ دى لازملها وقفه...لأول مره فى حياتى اعيش هذه اللحظه الحرجه...كنت لابس التي شيرت و الجاكيت فوقيه و نازل ترلم ترلم على السلالم علشان الحق المحاضره و إذا بى افتح باب العماره و اخرج و اتجمد...عمرى ما كنت اتخيل انى اموت بالطريقه دى...ما كنتش فاهم...مشيت على الكوبرى و فجأه ما بقاش ليه صوابع...فين الصوابع...نو صوابع...بكيت...و جريت على الكوبرى ادور على صوابعى اللى وقعوا...و ما فيش حد من الناس اللى على الكوبرى كان عاوز يساعدنى...كله مشغول و مش عاوز يتأخر على الشغل...المهم ما لقيتش غير تسع صوابع و كتر خير أم مايكل اللى لمت الصوابع فى كيس المكياج بتاعها و جرينا على اقرب مستشفى...و دخلونى فورا اوضه العمليات و فى اللحظه دى كنت عاوز ماما و بابا و كنت قلقان ما فوقش من البنج...بس الحمد لله العمليه فشلت و ما بقاش ليه صوابع العب بيها و من النهارده حاكتب فى البلوج عن طريق جهاز الفيربال سبيكار...و حطينا على الكوبرى اعلان إن لو حد لقى صوباع مصرى اللى فى نص الايد يحطه فى أى حته هوه عاوزها علشان خلاص ما ينفعش نخيطه النهارده

و ده اللى انا حلمت بى أول يوم تحت الصفر لأنى ما كنتش مستعد و ما فيش لحاف و لا بطانيه و لبست كل اللباس اللى عندى و تلات شرابات فوق بعض و لبست شرابات فى ايديه و لفيت راسى بالفوطه و الا الهوا...جالى كوابيس و فى نفس الوقت ما عرفتش انام و مش عارف إزاى...دى ممكن تسمى كوابيس اليقظه...الشحات فى مصر بينام برضو متدفى

بس الله...الدرجه واحد تحت الصفر...طب ما كانش ينفع صفر بس...يعنى كانت حاتفرق يا واد...طبعا روحت اشتريت بطانيات و الحفه و جوانتيات و شالات و الذى منه و دفعت بقه اللى دفعته كله يهون و ابنى ما يبردش على رأى مامى

بس لذيذه...واد مصرى جاى من ورا الجاموسه و طول عمره عمال يعرق يعرق...فى اتوبيسات النقل العام و فى الشارع و فى البيت و فى الغيط...و لابس توانتى فور سفن فاليله بيضه بيضه و واقف بالفليله البيضه البيضه ابو حملات حملات ادام المروحه و بيقول مش عارف اذاكر اللى بذاكره من الحر...اهو انت النهارده يا ولدى فى الفريزر...ايه رأيك و رأي مامى

و الله رأيى إن هذا هو احساس الانتعاش بالفعل...مش محتاج غير شيشه و فيروز اناناس بالتلج...مره اخرى فيروز اناناس بالتلج...لانى عمرى فى حياتى ما شوفت التلج...و يا رب يجى اليوم اللى اشوف فى التلج ...و المسه...ايوه المسه...بصوابعى كلها... و ابقى سلملى على التاتااااكيف

هو صحيح...الجو عامل ايه فى مصر...مش فى سحب بيضه برضو بتدخل من الشباك؟

-->