جنزير
اول خنزير جم يعدموه قالو له عاوز تقول حاجه...قالهم مش حاتكلم غير فى وجود المحامى بتاعى...راحوا عادمينه يا روح امه...وحشيه...همجيه...بربريه...طيش إرهاب...قال الغلابه اللى كان مصدر التغذيه السليم بتاعهم الخنازير النقيه مش حايلاقوا حاجه يكلوها بعد كده...حايعضعضوا فى صوابعهم و ياكلوا فى شعرهم...قال حايعوضوهم على كل راس خنزير بكيس زباله اسود...و الكيس مش فاضى...الكيس مليان زباله ببلاش...معظمهم المسيحيين حايقولوا مش معنى الخنازير و مش الفراخ...قالولهم انتم كده حاتعملوا فتنه طائفيه...اصل انفلونزا الطيور ما بتفرقش بين مسلم و مسيحى...بس انفلونزا الخنازير بتفرق...ازاى...مش عارف...بس شوفت ازاى
اتفضحنا فى العالم كله بعد ما صدر القرار الجماعى بإعدام الخنازير البريئه...الخنازير اللى ولا بتهش و الا بتنش...كائن لطيف ظريف بامبى...ربنا خالقه زينا من لحم و دم...ليه قلب بيحس بيه...و ليه عين بيشوف بيها...بياكل زبالتنا...و بينفض شوارعنا...بس إده بجد…كل يوم مؤشر الأى كيو بتاع المسئولين للأسف بينزل تحت الصفر...و بيؤكدلى إننا فعلا بنتقدم للخلف…إيه اللى دخل إنفلونزا الخنازير بإعدام الخنازير...طبعا كلمه خنازير...مدام فى كلمه خنازير يبقى كله على الخنازير الشريره اللى عاوزه تموتنا...كوخه خنزير…ليه كده خنزير…يلا هجوم على الخنازير...تصرف بلدنا خلى و بكل فخر العالم يتحرك و يغير اسم المرض من انفلونزا الخنازير إلى انفلونزا اتش وان إن وان أى...ابنى اللى بيرضع ساب الرضاعه علشان يقول لى ليه يا بابا حايعدموا الخنازير...مدام الوباء بينتقل من إنسان إلى إنسان...قولت له اصل يا بنى احنا فى مصر...بلد الحضاره و التاريخ...اده يابنى انت بتتكلم و انت عندك شهرين...مش مهم الوقتى...كنا بنقول ايه…المهم يا حبيبى احنا عاوزين نكون مثل عالمى يحتذى به فى تربية الخنازير...لازم تتربى صح...عاوزين نبقى اول دوله فى العالم بدون خنزير ريرى يايه واحده...زى ما بقينا و الحمد لله اول دوله عالميا فى عدد المصابين بانفلونزا الطيور...اول دوله ذكيه فى الغباء...غباء جماهيرى شعبى موحد...لا للخنازير...لا للوباء...لا لإنفلونزا الطيور...لا لإنفلونزا العصافير...لا لا لا...لا...عاوزين ننتصر مره…و نصنع المستحيل…مستحيل ايه يا بابا…هو بنى ادم واحد...واحد بس...وان اونلى...اند زا اونلى وان...يدخل بإنفلونزا الخنزير مصر...و اؤكد لكم...ثم اؤكد لكم...إننا سوف نكون البلد المسئوله بالفعل عن إباده البشريه فى عهدنا الجميل المبارك...إباده الجميع من على سطح الأرض...اصل احنا شعب نضيف...عندنا ثقافه صحيه...بيبوس بعض خمسميت مره فى اليوم...بيتفتف و هو بيتكلم...بيغسل ايديه نفسيا الصبح و الضهر و بالليل...و عددنا قليل...ميت مليون بس...عايشين لازقين فى بعض...فى العشوائيات و الميكروباصات و تحت الكبارى كمان...هو واحد يدخل مصر المهروسه...مش عارف إيه اللى يجيبه مصر...المهم هو الواحد ده يدخل المترو...أو القطر…يتخنق...يعطس...هاتشو...الميت واحد فى العربيه الواحده جالهم انفلونزا خنزير و الحمد لله...الموظف راجع من الشغل جايب لعيلته ايه...كباب...لأ...بطيخه...لأ...امال ايه...العيه و الحمد لله...الاب يعدى الام...الام تعدى العيال...العيال يروحوا الصبح المدرسه...الفصل فيه ميت عيل...كل عيل خادله انفلونزا هديه...و همه يومين...يومين فقط...يومين اونلى...اند ذا اونلى وان...اند ذاتس ايت…باى باى مصر...باى باى امه عربيه...باى باى عالم...شكرا جمهورية مصر العربيه...و نتمنى لكم رحله سعيده إلى العالم الآخر...تمت
لما سمعت الكلام المخيف ده…ايقنت إن دى حكمه الهيه فى اعاده التوازن على كوكب الارض…فعلا عدد سكان العالم كتر و بالحال المشاكل بقت اكتر…و الازمه الاقتصاديه…و الحروب العالميه…لازم نفضى العالم شويه من الناس الخنيقه الضعيفه...بس عمرى بصراحه ما كنت متخيل إن فيروس صوغنون مووت يقضى على البشريه...اصبحت البشريه بتقاتل من أجل البقاء...آن الأوان على شعوب العالم أن تتحد…أن تنسى مشاكلها و تتحد من اجل هدف واحد…من اجل الحفاظ على الجنس البشرى…أنا سرحت صح…لكن لما فوقت تذكرت اسرتى اللى ماليش غيرها فى الدنيا…و روحت نازل الصيدليه…اشتريت علب دوا تاميفلو يكفينى انا وعيلتى سنه…و اشتريت ماسكات…و روحت السوبر ماركت جبت علب مايه معدنيه و رز و مكرونه و علب تونه و فول و اغذيه جافه تكفينا سنه…و سحبت كل حسابى من البنك…و عملت حسابى لما تيجى ساعه الصفر ابقى جاهز…مستعد…حاقفل على نفسى و عيلتى باب الشقه بالترباس…مش حانخرج للشارع خالص…حنقعد فى البيت سنه و نعرف الاخبار عن طريق التلفزيون و الانترنت…و حابقى اكتب فى البلوج عن اخبارى و احوال عيالى…اه ده انا نسيت ادفع فاتوره الدى اسل ال…حابقى استخدم خط التليفون…طب و خط التليفون حابقى ادفعه ازاى…و الكهربا…و الغاز…و ايجار الشقه…طب هو فى حد حايطلع فى التلفزيون صحيح…اده و نسيت اشترى ماكينه حلاقه…و كروت شحن موبايل…و ورق كابينيه…و
ربنا يستر على الايام اللى جايه…ياترى ده ممكن يكون بدايه نهايه العالم؟
لو بطلت اكتب فى البلوج…يبقى اكيد
4 comments:
اسمحلي بس انت بتعرف تفكر؟؟
ولا من النوع الي بيتكلم وخلاص؟؟
خنازير ايه الي بتتكلم عليها و لما تجبلك وباء ليك و لينا و لأهلك و بلدك و تقضي علينا هنفرح ؟؟؟
خنازير بتاكل الزباله يعني مفيش اي مبرر لأكلها حتى زميلي المسيحيين موافقين على القرار و بيقولو ده الدكتور لما يمنع الواحد انه ياكل اكله علشان ممكن تضر صحته الشخصيه بيمنعها تخيل لما حاجه هتضر صحة امه بحالها هنعمل ايه؟؟ لا نشتم في الحكومه و نقول اي كلام في اي كلام... مع كامل احترامي لدينك مهما كان انا مسلم و الحمد لله والخنازير اكلها محرم عندنا لأسباب عديده و اسباب مثبته علميه. وياريت تقرا في ازاي المرض ده ممكن ينتشر بسرعه رهيبه لو مقدرناش نعدم الخنازير في اسرع وقت وفي حالات ماتت بالفعل و ربنا يسترها علينا.
اهلا رامى محروس
بص يا رامى
اتش وان إن وان بينتقل من انسان إلى انسان
لو الحكومه لمت الخنازير اللى فى البلد كلها و قفلت عليها فى الاستاد الحربى و رمتلها اكل من منطاد وحبستها هناك سنه عقبال لما المرض ده يخلص يبقى احسن
بس انسان عنده الفيروس برضو حايعدى انسان ما عندوش فيروس
ايه ذنب الخنازير بقه
علشان شكلها وحش و قذر
و المسلمين بيكرهوها
و المسيحيين ما بيكلوها
المرض مش فى الحيوان
المرض فى الانسان
البنى ادم المصرى لازم يتثقف صحيا
يعرف ازاى الوقايه الصحيحه من المرض
يعرف ازاى ينف فى الجلبيه أو الهدمه اللى لابسها
يعرف ازاى يعطس فى وش الناس
و يعرف يغسل ايديه بعد ما يلعب فى مرخيره
علشان ما يعديش الناس احباءه فى مصرنا المحروسه
و الا ايه يا رامى محروس
طب انت زعلان ليه ادام فيها ضرر؟؟
طب ه هي فكرة يحتوها في استاد هيدبحوها و يخزنوا اللحمه و بعد سنتين تلاته ان شاء الله يجيبوا بقى و يعملوا ثروه من اول و جديد
انتقال المرض من انسان لانسان فظيع و محدش يقدر يقول ان شئ هين
ديه ثقافه شعب مقدرش اعترض معاك فيها الشعب اخلاقيا بقى زي الزفت بس ديه نقطه تانيه خالص
وهما برده هيمنعوا بيع الفراخ الحيه كله هيبقى مجمد اي المشكله امنع المرض على اد ما تقدر
عندك حق ياولد شاب ...احنا ..اللى هو الملايين اللى فى مصر دى لو متعلمتش لو متقدمتش واتحضرت هنضيع ومش هينفعنا دبح خنازير العالم كلها
Post a Comment