مطلوب عريس - فورا أو حالا أو دالوقتى

التجربه دى يمكن تكون نادره شويه فى مصر بس انا حبيت انى اجرب من خلال المدونه انى اتواصل مع نصفى الآخر ، و مش عيب ان الواحده تأخذ بالاسباب و فى نفس الوقت تجتهد انها تلاقى رفيق الحياه من خلال الانترنت ، و بما انى عندى مدونه ليه ما استخدمهاش كوسيله للتعارف و خاصه إن المدونين أو اللى بيقروا المدونات معظمهم مثقفين و متفتحين و كمان انا اعرف مدونين كبلز اتعرفوا على بعض من خلال المدونات و اتجوزوا دالوقتى بنجاح... و بعدين اهى تجربه ، مين عارف يمكن تنفع ، و الله الموفق

مطلوب فقط انسان بسيط متعلم بيعرف دينه الاسلامى كويس و ذو اخلاق حميده و يكون من اسره كريمه و يكون شكله مقبول و الا يزيد عمره عن تمانيه و عشرين و شكرا

و على من يرغب فى الالتقاء و التعارف ارسال 3 صور حديثه و السى فى بتاعه و صوره من البطاقه على الايميل اللى مكتوب على الناحيه اليمين فى صفحه المدونه و شكرا

سوف يتم ارسال ايميل للعريس المختار مع ميعاد و عنوان مكان اللقاء و شكرا

لى الحق فى عدم قبول اى عريس من العرسان المتقدمين للزواج بدون ابداء الاسباب لعدم الاحراج و شكرا

اهم حاجه عندى انه يكون ملتزم دينيا و على الاقل يكون حافظ عشر اجزاء من القرآن الكريم و شكرا

كنت حانسى...ياريت يكون مش تخين و ما يكونش عنده شنب و الا كرش و الا اقرع و ما بيلبسش نضاره و تكون عينيه يا اخضر يا ازرق و ما بيشربش سجاير و شكرا

و فرصه اختيار عريس الحظ سوف تزيد اذا كان رجل اعمال مهندس أو رجل اعمال دكتور أو رجل اعمال دبلوماسى

آه و حاجه كمان...يا ريت يكون عنده شقه لا تقل مساحتها عن 300 متر مربع و يكون فى منطقه المهندسين و الدقى حيث اننى من مشتركى نادى الصيد و شكرا

يااه كنت حانسى حاجه مهمه جدا...يا ريت يعنى يكون مرتبه فى الشهر لا يقل عن 4000 جنيه علشان انا لا مواخذه مش ناقصه بهدله و شكرا

بس...و ياريت يكون جنتل و حنون و طيب و ما بيزعقش و الا بيتنرفز و الا بيشتم و الا بيضرب و من مؤيدى حركه تحرير المرأه و شكرا

و يستحسن انه يكون مثقف جدا و من عشاق نصير شمه و صنع الله ابراهيم و من محبى افلام جورج كلونى و يكون قرأ ذا الكاميست اربع مرات و شكرا

و حتكون ميزه لو عنده نزعه انسانيه و اسهامات فى قضايا المنطقه كالقضيه الفلسطينيه و دارفور و زوبان الجليد فى القطب الشمالى و شكرا

و اخر حاجه انه يكون مش بخيل و المقدم ما يقلش عن 100 الف جنيه و المؤخر ما يقلش عن 500 الف جنيه و الشبكه ما تقلش عن 50 الف جنيه و يشيل تكاليف الفرح و الخطوبه و شكرا

و ايه كمان...هممم...يبقى جميل اوى لو الوالده تكون مش موجوده فى مصر او فى الحياه...و شكرا

و يا ريت بس اخر حاجه علشان نبقى متفقين من الاول ان شهر العسل يجب ان يكون فى منطقه خارج الحدود المصريه و الا يكون فى دوله عربيه أو اسلاميه و شكرا

و يبقى كويس برضه لو بيحب الحيوانات و خاصه القطط علشان انا عندى 2 قطه و ما اقدرش اعيش من غيرهم و شكرا

شفت كنت حانسى...اهم اهم حاجه يكون عنده عربيه بتكيف من انتاج سنه 2000 أو فما فوق و شكرا

اللى يحب يعرف اكتر عن شخصيتى ممكن يتعرف عليها من خلال مدونتى و شكرا

و اخيرا احب اقول ان اهم حاجه بالنسبه لى فى شريك الحياة انه يكون بيعرف يطبخ حاجات تانيه غير البيض و شكرا