و المصريين اهمه
المهزله تبتدى من باب المطار لما يجوا المصريين اللى طالعين عمره بكل الاهل و الاصدقاء و الاحباء و يلا نبتدى نحضن و نبوس فى بعض و لما ادى اشاره تزغرتى زغروتايه صوغانونايه وشويش خالص مالص بس تهز كل المطار علشان انتم عارفين احنا فى المطار و مش عاوزين حسد ، و تنطلق الزغاريت و العفاريت و كل الاجانب تنظر الى حفل الزفاف الجماعى و بيصوروا مش كاميرا بس لأ فيديو كمان ، و كله لابس ابيض فى ابيض علشان غاسلينه بكلوروكس و بالمناسبه اريال طلع احسن من برسيل ، و احنا استحمينا و بقينا فل الفل و يلا بينا مع بعضينا على الطياره لاحسن تفوتنا و تبقى مصيبه و باى باى يا مصر و مع السلامه و ياريت مانشوفكيش تانى و نموت بقه و نخلص و احنا بانطوف علشان زهقنا بقه من العيشه النكد دى و الاسعار خلاص مولعه و المدارس على الابواب و ندخل احس الجنه حتفالشكل التقليدى لاسره مصريه على ارض سعوديه...عارف... البنى ادميين المصريين من غير ما ينطقوا و الا يفتحوا بقهم بيشعوا مصرنه...الاب...عقبال عندك ما صدق يلبس الجلابيه اللى مانعينه يلبسها فى مصر... و ماشى يتمختر بيها... اما ما يبظ من تحت الجلباب... فهو الكرش المصرى... يشبه الكوره او البطيخ عندما نخبئه تحت جلبابنا... و من الخلف اشجار من شعر الجسم الجميل ينبت على ضفاف القفا و يخرج من تحت حز الجلباب يطل برأسه على كل اللى رايح و اللى جاى...الام...برضو عقبال عندك لابسه جلابيه...حاتلبس ايه يعنى...دائرتين فى الامام...دائرتين على الجناب...دائرتين فى الخلف...و دائره كبرى على كرسى القياده...و هيا نمشى معا ماشيه الوزه...اتدرى ما هى ماشيه الوزه...انها ماشيه ارجوحيه تمشى برجليك بالجنب مع انك ماشى للامام...و شوف بقى لما تمشى و انت بتتمرجح...يمين ... شمال... يمين... شمال...لذيذ... و شايله كرسى من اللى بيتقفلوا دول... الابناء... نفس الشكل.. بس على صغير...و باحجام صغيره... و الموضه السنه دى اطفال بكروش... و لو فى معاهم بنت شابه...يبقى لازم تكون لابسه نضاره سوده بيير كاردان
كوكو بيكلمنى من مصر علشان يقول لى انى اشتريله ساعه يد معينه... روحت اسأل عليها قال لى ب 1500 رس... اصل انا حرامى بنوك بس نسيت... و المصيبه انه كان هنا ادام المحل ده من يومين... كوكو بقه نعمل ايه
دخول بن داوود مش زى خروجه... هجوم المصرى على اكله الشخصى... عندما ينظر المصرى الجعان الى ارفف بن داوود... فماذا تنتظر منه ان يفعل الا ان تدمع عيناه و يسيل لعابه...فهو لديه لأول مره فرصه للاختيار...ايختار هذا ام ذاك...هذا و ذاك و ماك و كله يا اسطى... ده احنا جعانين... و فى لسه حتت فاضيه بين الوراك و الكلاوى عاوزين يتملوا فات... يا ماما فين العيال... اهم العيال... بصوا يا عيال... عاوزين تنضفوا المحل كله... مش عاوزين نسيب فيه حاجه مليانه... يلا واحد اتنين تلاته هجوم... اول مره اشوف ست مصريه بجلابيه بتشرب بايسون... و كلك حركات... و بالمناسبه ...طعمها عامل زى الدوا المغشوش
ما فيش اى حد صوته عالى فى الحرم غير صوت الامام و صوت المصريين...لو لقيت اتنين قاعدين ادام بعض فى وش بعض و بيصرخوا فى بعض و هما بيتكلموا يبقى اعرف ان دول مصريين ... على فكره ده لازم يتعالج فورا... فى حاجه غلط فى الفوليوم بتاع حبالنا الصوتيه عاوزه تظبيت... اصل احنا متعودين على الصويت و الولوله... و احلى منظر لما واحده ماسكه الموبايل بالمشقلوب و بتكلم مصر من الحرم و بتصرخ و هي بتبص للسقف علشان اللى هناك فى مصر يسمعها...فتصور وليه بتنادى لوليه مصريه فى الحرم و بتقول لها تعالى هنا لقيتلك مكان...تقوم قايلالها... طب انا جايه اهو... مش عارفه اقفل المحمول... و البازابورط حايوقع منى... ايوووهلم تستطع ماركه المصريين التجاريه شبشب او تو ان يحتفظ بالصداره بعد ثلاثه اعوام من التألق... و احتل مكانه شبشب مجهول المصدر لونه ابيض و شكله بلاستيك و تخين و بيخوف... جامبو
اجمل منظر هوه الوز و هوه شايل بطاطين فوق دماغه... اصل مصر ما بتصنعش بطاطين و الشتا جاى و انا رجليه سقعانه ... المصريين دول غاويين شرا بطاطين من بره... و ما فيش مانع من حلل ستانلى ستيل و شوك و سكاكين مع اننا بناكل يا بالمعلقه يا بايدينا... و ما فيش اى مانع بقه من فوط بقه و اطباق بقه و كبايات بقه ... و بقه بقه... و ليه ما نجيبش لبس لزوم الشتا برضك... الارتيكاريه الشرائيه المصراويه لما تبتدى فمن الافضل ان تبتعد
بتديلى بلحايه فى الفطار... ايه قله الذوق دى...اصل انت ما تعرفش انا مين... ده انا المصرى يا ولد العم... مش صومالى معصعص... مش شايف اللى فى بطنى... انا لما افطر... افطر عالطول...يعنى من غير مقدمات... فراخ ... لحمه... رز... محشى ... مكرونه... يعنى لما تعزم عليا... اعزم عليا صح... اعزم عليا بحاجه تتاكل... مش بلحه... بلحه ايه يا راجل
الغزو المصرى فى رمضان للاماكن المقدسه...اصل رمضان شهر خير و مغفره... ماقولتش شهر كريم و مبارك لحسن يتقبض عليا... و الذنوب بتغتفر... و ذنوبنا كتير بقه... و عاوزين نمسح بتوع السنه دى... بعد ما مسحنا بتوع السنه اللى فاتت... و بعد سنه ان شاء الله نعمل عمره تانيه و نمسح الذنوب اللى لسه حانعملها... اه... كل سنه نروح نمسح ذنوبنا ثم نيجى مصر الحبيبه و نعمل شويه ذنوب كده ... ثم نروح السعوديه مره اخرى... لماذا... ما انا قلت... علشان نمسح الذنوب... و الله غفور رحيم
لأ فعلا المصريين بيبقوا حاجه تحفه كده لما الواحد يشوفهم فى الكادر بعيد عن بلادهم و فى وسط ناس تانيه من شعوب تانيه... كل شعب و ليه اسلوبه و ستايله... بس الستايل المصرى اوعى وشك... بلا منازع... و الحاجه الجامده ان كل واحد يشوف واحد مصرى هناك يقوم مديله عالطول كتف قانونى... انت فاهم قصدى ايه... مش مهم تفهم
كل مره احلف انى عمرى ما حاركب مصر للطيران دى تانى... برضه الاقى نفسى فيها مش عارف ازاى... عبيط انا بقه... و فعلا بقه ده عن تجارب عديده... فعلا مصر للطيران دى تانى اوحش وسيله مواصلات فى العالم... التأخير هو شعارها... و الخدمه المهمله هى ادائها... و المضيفه فاكره نفسها واو حلوه صاروخ و هى اساسا شبه قفاها بس بالالوان... و تجيب لى الاكل و هى متوتره مش عارف ليه... ما تتوتريش يا حبيبتى.. دى اول مره تركبى فيها طياره و الا ايه...اول ما حطت الاكل و لسه بقول بسم الله الرحمن الرحيم و حاكول الاقيها بتشيل الاكل من ادامى... طب احلف بقيه ان ده حقيقه مش تأليف... قال ايه بتبتسملى ابتسامه خضراء و تقول لى ... ايام ثورى ... و ايام مصرى ياختى... ايام ثورى الطياره حاتهبط... طب ما جبتيش الاكل من بدرى ليه و انت عارفه ان الطياره حاتهبط... جاتك هبطه فى قلبك_
اقف فى مطار القاهره على سير الشنط... انتظر قدوم شنطتى... ارى جركل مايه ابيض قادم... مكتوب على الجركل الحاجه ام محمد... ثم ارى جركل مايه اخر ابيض برضو مكتوب عليه الحاجه ام محمد... ثم بعد دقيقه ارى جركل ابيض قادم... يا ترى جركل ام محمد... يا ترى جركل مين... جركل مين... انه قادم... قادم قادم... مبروك... انت الفائز معنا فى عمره شهر رمضان... انه فعلا جركل ام محمد... عرفت ازاى... اصل انا محمد
No comments:
Post a Comment