Facebook sucks

ال فايس بووك ده يا جماعه ابشع اختراع عرفته فى حياتى ... فاشل... لو شوفت اللى اخترعه مش عارف ممكن اعمل فيه ايه... و لو سمعت اى حد بيقول كلمه فايس بووك ... احسنله ما يقولهاش قدامى

اول ما عملت بروفايل فى ال فايس بووك دورت على حبيبه زمان ... اقوم الاقى اللى كنت بحبها و فضلت احب فيها لأكتر من تلات سنين حطالى صوره ليها هى و جوزها ... فعلا كان عندها حق مش بس ترفضنى اياميها ... ليها حق تتف عليه كمان... بجد الاتنين شكلهم لايقيين على بعض فشخ ... ما فيش مقارنه بينى و بينه... هو شكله احلى بكتييير و اغنى بكتيييير و شكله اجنبى كمان

قلت ابص على صحابى بتوع زمان ايام المدرسه... كنت متشوق اعرف همه العيال دول عملوا ايه بقه فى حياتهم بعد ما اتخرجنا ... انا مش كنت عاوز بقه اتف على نفسى ... انا كنت عاوز ارمى نفسى من اى بلكونه قاهريه ... ايش البت اللى كانت قاعده جنبى فى الفصل بتدرس فى هارفرد ... و البت التانيه فى اوكسفورد... و ايش الواد ده خلص ايه يوو سى ... و ده بقه استاذ سياسه و اقتصاد فى ال جاى يوو سى ... و ده بيشتغل فى ال اى تى بيزنيس فى شركه كبيره فى ابراج نايل سيتى ... و ده بيشتغل فى انجلترا ... و التانى فى دبى... و ايش اللى خلف و حاطت بنته الاموره بيتمختر بيها على الفايس بووك ... و ايش اللى اتجوز ... و ايه... عروسه زى القمر... بجد ... ما شاء الله ... و حاطت كمان صور الفرح التحفه ... معمول باستيل امريكان فى حته جميله اوى على النيل و الصور طالعه بتنطق و تقول يا حلاوتك يا عريس و يا عروسه ... و مش بس كده ... ده حاطت كمان صور شهر العسل فى اسبانيا... و يا سلام على الكومنتات بتاعت الناس ... تقطع المراره... و انا شكلى الوحيد اللى لسه فى كليه مهببه بستين نيله مع ناس معفنين باسلق فى البيض بتاعى علشان لسه ما استواش

و كل واحد و ماليلى الصفحه بتاعته صور صور صور ... كل دول اصحاب ... جايبهم منين دول... ده انا صحابى ما يتعدوش على صوابع الايد الواحده مش الايدتين... اده... الاقى زميلى اللى كان فى المدرسه بيتهته و خجول و حالته حاله و شكله استغفر الله العظيم ... الاقى البنات حايتجننوا عليه .. كل واحده كاتباله كومنت جابلى الأللوط... يا حبيبى واحشنى ... و واحده كاتباله البارتى بتاعت امبارح فى سنجاريا كانت منوره علشان انت كنت موجود ... و صورتك دى سكسى اوى و دى كوول مووت ... و انا طبعا بقره ببربور... ما تيجى تبوسينى احسن

ده انا حاطت فايس بووك بروفايل بتاعى شهور و ولا واحد كتبلى فيه كومنتايه ... طب شحتونى كومنتايه ... منظرى مش حلو خالص كده

عملت ايه بقه فى حياتى ... كل الناس ناجحه و مظأطته ... مش عارف مظأطته تتكتب ازاى ... كل الناس مبسوطه يعنى ... مفرفشه ... متهشتكه ... متدلعه ... كل الناس مصاحبه بعض ... و انا مصاحب نفسى
حظى دايما وحش ... ما عرفتش اعمل صحاب و انا فى المدرسه ... و ماعرفتش اعمل صحاب و انا فى الجامعه ... خلاص راحت عليه
هو انا وحش و الا ايه ... اكيد انا وحش بس مش شايف نفسى كويس ... اكيد فيه حاجه غلط و انا مش عارفها

حاسيت ان الناس مش هاممها تطلع نفسها بالبكينى... او تقول هيه حاتعمل ايه فى حياتها ... ده انا عرفت تقريبا قصه حياتهم كلها من ال فايس بووك

من الاخر... لو عملت لنفسك بروفيل يبقى اعتبر نفسك من اللحظه دى شبه عريان امام الجميع...فى ناس حاتعرف عنك كل حاجه...و فى ناس تانيه حاتستغل المعلومات دى اسوأ استغلال...و كل ده و انت مش عارف

اعتبر الخصوصيه اللى هى جزء اساسى من صفه الجنس البشرى مافيش... بح خلاص...راحت...حاتيجى البت تقولك اصل انا ممكن اعمل كنترول على اللى يدخل لى و اللى ما يدخلنيش...ما فيش اصل و لا فصل...انت اهبل ياهبل...انت عارف مين اساسا اللى عامل الط*ز بووك ده...مين...قول لى مين...المعلومات و الصور الجنان اللى منوره شاشات الكميوتر حول العالم فين...فى الهوا...لا طبعا...اكيد فى حته متخزنه...و مين عالم ممكن يحصل ايه

و بالمناسبه...احنا عارفين يا اختى انك شريفه و سجلك زى الفل

و مش عارف لاقيت ده طلع يعرف ده...اده...و ده يعرف ده كمان...اده و همه دول اصحاب من امتى

ده فى اتنين زمايلى فى الكليه عرفت انهم اتخطبوا قبل ما يعلنوا فى الكليه بشهر علشان البت حاطه الصوره الرئيسيه فى البروفيل و هى ماسكه ايد الواد

و الاقى ناس بقه عمله صوفح تخليك تاكل شعر راسك ... كان نفسى اقول كلمه تانيه بدل راسك بس عيب كده خلاص ... مش عارف لاقيت صفحه احلى بنوته تحت العشرين ... و جروب اختيار فتى ابو جسم جامد كيك ... و محبى مش عارف المطرب هباب... و اللى بيكرهوا الفنان الفلانى... و جرووب محبى التهييس...ايه الفراغ ده... ده واحد من صحابى لاقيته كاتب انه رايح ياكل دالوقتى ... ما تروح ... و انا اعمل ايه دالوقتى ... اسأفلك ... ناقص تكتب انك حاتروح تشخ بعديها ... تحس الناس صاحيه نايمه على ال فايس بووك ده

اخويه بيقول لى هو مين قال ان كل دول سوعده فى حياتهم ... اكيد لازم يطلعوا فى الصور بيضحكوا ... بس ممكن يكونوا عندهم مشاكل... و اكتر منك كمان

امى لما شافت ال فايس بووك و صحابى اللى كانت تعرفهم و تطورات حياتهم قالت لى ... انت عندك حق يا بنى ... يلا اكتئب ... و الله العظيم قالت لى كده ... احباط ثم احباط و يتبعه احباط ... احباط متواصل

اللى ضايقنى اوى انى عرفت ان اتنين اللى كنت اعرفهم ايام المدرسه ماتوا ... صحابهم عملين صفحه فايس بووك لذكراهم ... كاتبين انت واحشتنا اوى ... و انت كنت ملاك يا بوزو... و انت كنت البهجه فى حياتنا ... عمرنا ما حاننساك ابدا

طب فى حد ممكن يعمل لى بروفايل للذكرى بتاعتى لما اموت... مين حايعمل كده و انا ماعنديش حد اساسا
لما ببقى متنرفز مش عارف فى صوباعين من صوابع ايديه الشمال بيتشلوا ... مش بيتشلوا اوى بس بيجيلى وجع بينئح بطريقه عجيبه... لإن اكتر حاجه بجد باكرها فى حياتى لما اكون عامل حسابى على حاجه ... و ما تحصلش ... اصل كل يوم باخد خابور كبييير ... إن حد يخرج معايه فى الاجازه ... مافيش ... انا قولت بقه الاجازه جت و مافيش حجه ... ايش اللى اكلمه يقول لى ماشى يلا نخرج و حاكلمك بعد نص ساعه و تعدى نص الساعه و ما يتكلمش ... اكلمه مش بقه يقفل عليه زى زمان ... الموضه الجديده انه يسيبنى ارن ارن
هى الناس ما بقاش عندها ذوق و الا ايه ... هى الناس دى بتفكر ازاى ... حاموت اعرف الناس دى ما عنداش اى احساس بالاخر ... و اللى يقول لى اصل عنده مشاوير مع اهله و اللى يقول لى اصله لازم يوصل مش عارف مين مارينا و لما يرجع حايتكلم

امبارح بقه كنت خلاص حانفجر و نفسى حامووووت اخرج .. حلقت دقنى بقه و استحميت و عملت شعرى بالجيل و لبست احلى لبس و رشيت هيوجو بوص و مستنى صاحبى يرنلى زى ما قال علشان انزل ... مارنش ... كلمته بس الموبايل خارج نطاق الخدمه ... قلت ما ليش دعوه لازم انزل ... مش معقول بعد كل اللى انا عملته فى نفسى ده و فى الاخر ما انزلش
حاولت اكلم اى حد من صحابى انه ينزل ... مش عارف ليه كل واحد عاملهالى قضيه ... ايه يعنى الساعه حداشر بالليل ... احنا فى الصيف يا جماعه ... ايه يعنى لما ينزل ... اصل بابى ... اصل مامى ... اصل مش كنت تقول لى من بدرى و النظام الكحيان ده ... جيل متدلع ... كسل ... يا اخى ما تنزل و ماتكبرهاش ... ما فيش و الا حد رضى ينزل... وقتها الدنيا كلها ضلمت فى وشى ... انا فعلا و لا شىء فى الدنيا دى زى ما قلت زبرميييت مره قبل كده ... ما عنديش حد يبقى صاحبى فى الحياه... شريك حتى الموت

فضلت ماشى فى الشوارع قلت اروح اقعد شويه فى سيلانترو ...لاقيت الولد حاطتلى اللاب توب و حواليه اربع بنات عسل تقريبا مش لابسين حاجه و عمالين يضحكوا و يشاوروا بايديهم على شاشه اللاب توب... يا ترى ايه اللى عاجبهم اوى كده و عمالين يتفرفشوا عليه... عملت نفسى رايح الحمام و بصيت على شاشه اللاب توب بتاعته و اذا الاقى المصيبه الكبرى ... ال فايس بووك ... جالى عقم ... قررت انى مش حاخرج من بيتى ده تانى ... خرجت من سيلانترو مخنوق و حاسيت ان روحى حاتطلع ... و روحت اشتريت بيتزا هت ببرونى وسط بواحد و عشرين جنيه و نص و من البقال الحرامى اشتريت بيبسى دايت باتنين جنيه و جبت فيلم دى فى دى و اتفرجت عليه و نمت