City Stars, je t'aime

سيتى ستارز... رمز المدينة المثالية لكل المصريين
المدينة الفاضلة...المدينة الجميلة
تبهر كل زوارها ببريقها و تألقها الدائم
و تعطى لكل روادها الشعور بالراحه و الرضا و الأمان
و هذا ما دفع ابو سيد و اسرته لترك مدينته المظلمه
وزياره المدينه التى يتكلم عنها الناس
مدينه النور
مدينه الاحلام

ياله يا وليه
صحى العيال وصلنا
ايوه هنا ياسطه
ممكن تحاسب شويه
تعاله يمين او شمال بس ماتقفليش فى النص
و خلى المدام تعدى
ياله يا ام سيد
يا سيد... بت يا فوزيه...اصحى يا بت وصلنا خلاص
ماما عاوزه اشرب
لما نروح هناك تبقى اشربى
عارف انت موادينه على فين
يا وليه اسكتى شويه ... مش عاوز كلام خالص
اله... ما تسيبنى افضفض شويييه...يعنى انت واخدنا
تفسحنا و لا يعنى واخدنا تفسحنا
اله... يا راجل...فثثث

من فضلك ما تعرفش سيدى زطاريز فين
امشى عالطول و اول فاتحه يمين حتلاقى جامع هوه اللى فوشك
متشكرين... ياله يا سيتى
بابا...انا تعبت مالمشى
يا راجل جاى تفسح العيال فى حته اطيعى...ده المكان كله كحل
اسكتى يا وليه لاحسن...
لاحسن ايه...ما انا عارفه... اليوم ده مش حايعدى على خير...اااهههخ منك... جايبنى بالعيال على مالا وشى و انت مش عارف مودينا على فين
ماما... انا عاوزه ميه
عاوزه لبان سماره...خدى لبان سماره...واد يا سيد... عاوز انت لبان كمان
هوه انا قولتيلك تيجى خالص... انتى يا وليه اللى عماله تزنى على ودنى و تقوللى ودينا سيدى زيطارز ودينا سيدى طراز لغايه ما دوشتينى
ماهو ام محمود راحت بالعيال لسيدى طياز الاسبوع اللى فات و قالتلى المكان حلو اوياوياوي و عيالها امبصتوا اوياوياوي

من فضلك فين سيدى طارز
هناك اهو
هييييييهه
سيد...سيد...تعاله هنا يا واااد... انت يا ولد
ماما ماما...فى سلعوه حاتعضنى
اجرى يا بت بعيد عن الكلب
بابا...همه ماسكين السلعوه بالحبال ليه
بسم الله الرحمن الرحيم... يا جمال الاهرامات... يا حلوتك يا ابو الهول... اله... مش شايفه ابو الهول
هوه الدخول منين لو سمحت
من الباب اللى جاى ده
فوزيه...سيد...تعالوا هنا

بيييييب
من فضلك لو معاك موبايل او مفتاح تحطه هنا
معناش حاجه يا فندم
الجهاز بيصفر
اكيد معاك اى حاجه معدنيه
اله يا اخى... مالراجل قالك معهوش...خلونا نعدى بقه
يلا يا بت... يا سيد... تعالوا هنا
يا مدام ما ينفعش كده
اوعى كده دى حاجه تطههأ الله...المكان ده حلو اوياوياوي
ماما عاوز اطلع بالمرجيحه
خد بالك يله مالسلالم...الله... ما شاء الله... ايه الحلاوه دى
دى الدنيا منوره اكتر مالافراح
يامه... انا عطشانه
بس...مش عاوزه اسمع اى كلمه بعد كده... فاهمه

ياله ندخل المحل ده... لأ ده... طب ندخل ده...دى المحلات دى معندهاش ذوق خالص... كله فانلات و كلتات و الذى منه... اده... ايه المناظر دى... شوف ياختى البت ماشيالى ازاى تترقصنى...ايه يا راجل...بتبص على ايه... اله... بص النحيادى
شوف الشابه يا عين امها ماشيه ملط خالص... مش لاقيه اى هدمه تتغطى بيها
اده اده اده... ايوووه... الوليه ماشيه مع جوزها و عيالها و مش مكسوفه من اللى لابساه... رجاله اخر زمن
شوف يا ابو سيد الواد عامل فى شعره اراجوز و البنطلون حيقع منه... هىء هىء هىء
اده اده اده...شوف الواد حاضن البت ازاى...اده... ده راح يحضن فى بت تانيه
ما تنقطينا بسكاتك ياوليه لاحسن ارجعك انت و العيال طوالى عالبيت
بابا عاوزين سندويتشات فول
فى مطاعم هناك اهوه
بابا و انا عاوزه عصير قصب
من فضلك عاوزين اربع سندويتشات زى اللى بياكلوه هناك ده و عصير
حضرتك عاوز اتنين كمبو و اتنين هابى ميل
ايوه اللى انت بتقول عليه ده
و العصير ميديام و الا لارج
لارج... لارج خالص
الحساب سته و خمسين جنيه و نص
نعم...ليه... دول اربع سندويتشات و عصير...خلاص... الف شكر...مش عاوزين
ايه يا راجل... نفسنا ناكل زاى الناس اللى بتاكل دى...العيال جعانين
لما نرجع نبقى ناكل فى البيت
ماما عاوز اشرب
طب تعاله اروح بالبت نشربها من اى كولدير هناك

كل اللف ده و ما فيش كولدير واحد فى المكان ده
تعالوا نقعد هنا شويه
حاتى شويه لب من المعاكى...لأ لب اسود
يا حلوتك يا ام سيد... الدنيا هينا تراوه اوياوياوي
لو سمحت حضرتك طالب حاجه
لأ الف شكر يا باشا
هوه حضرتك المينيموم شارج هنا خمسه و تلتين جنيه
للفرد
الف شكر يا باشا
حاتى شويه لب كمان
يا ابو سيد... الراجل واقف جنبنا ليه و بيبصلنا
انا حستأذن حضرتك انك تتفضل بالعيله فى اى حته تانيه
انا عمال اكلمك باحترام و شكلك كده مش نازلنى من الزور

دايما كده بتلبخى فى الكلام يا وليه... لو كنتى سكتى بس
يا راجل مش كده احلى ... نستربع كده على البلاط الفشتفى
من فضلك فين الحمام
ياله يا وليه روحى شربى البت فى الحمام

يا سلام على الحلو اللى ماشى ده...قمر...قمر ماشى و بيتمختر... طب خد بالك لحسن تقع
بابا بابا...هوه العربيات دى عرفت تطلع لفوق كده ازاى
و الله يابنى مش عارف
تعاله نروح نشوف السيما فيها ايه
اده... كل ديييى افلام ... لو سمحتى التذكره بكام...كام... لأ متشكرين
يا بابا عاوز اشوف
مافيش شوف
يااااهوووو... بت جامده... اوووف... اده... بولدوزر... أااه... سيد...ماتبعتش... تعاله هنا...مممم... الله على جماله... يا حلوه انتى يا سكره... اده اده... هوه ده واد و الا بت
سيد...تعاله نروح نجيب امك من الحمام

فوزيه... بت يا فوزيه... انت فين يا فوزيه... يالاهوى... البت تاهت... يا ابو سيد يا ابو سيد... مش لاقيه البت... دخلت اتسير و طلعت ما لقتهاش
مش قولتلك تاخدى بالك منها كويس...يخرب بيت اللى خلفوكى
ااااه يانى... يا غلبى يانى... بتى ضاعت... يا مدام الله ينوبك ثواب ماشوفتيش بت ماشيه من هنا...طب ماتبصليش كده من تحت لفوق... جتيك داهيه تاخديك

بينج بانج بونج...بونج بانج بينج... عثر على فتاه صغيره اسمها فوزيه و هى تبحث عن اهلها... يرجو التوجه الى الباب الرئيسى لاستلامها و شكرا

فى هذه اللحظه صرخت ام سيد بصوت هز الدور الثانى كله من سيتى ستارز : فوزيه... فوزيه... يا ضنى امك يا فوزيه

و هنا حمل ابو سيد ابنه سيد و امسك بيد زوجته و ابتسامه الامل ترسم بخط عريض فى وجهه الاسمر ليبدأوا معا فى العدو نحو باب الخروج من هذا الحلم الجميل