يااى - أنت بيئه طحن

البيوت اللى حواليه مبنيه تيك اواى بالطوب الاحمر
الراجل كان نفسه يغير
و فعلا غير

تلاقى الراجل بيلوح بايديه و صباعه الصغير طالع منه سيخ محمى علشان يحطه فى صرصور ودنه او حته تانيه بمعنى ادق مابيقصش دوفر صباعه الصغنن، قال ايه علشان لما يحتاجه فى الزنقه يلاقيه ، ايه البيئه ده

تركب الميكروباص تلاقى جواه الراجل ماليهولك ستيكرس قلوب حمره و فى نص الميكروباص صوره للسواق و عياله واقفين و وراهم صوره شلالات نياجرا او جبال سويسرا و طبعا لازم علشان المنظر يبقى طبيعى يحطوا من الجنب ورق اخضر و ورود صناعيه ، الانهيار بقه انه يا إلا لابس جلابيه بلدى أو لابس بدله بلدى و ملبس كل عياله بدل ، ايه البيئه ده

الموبايل منزلين منه شراشيب و حاجات بتنور و بيرن باحدث اغانى الفيديو الكليب البعروريه ، ايه البيئه ده

و الولاد و البنات لما يلبسوا تى شيرتات تيتانيك ايام فيلم ليوناردو ديكابريو و مشغلين اغنيه سيلين ديون عمال على بطال نقول ماشى ، يلبسوه النهارده ليه بقه، ايه البيئه ده

لما الست او البت او العيله تملى دراعاتها الاتنين سبايك دهب و تشخشخهملك و هيه بتتكلم علشان تقول لك انا غنيه اهوه، تقوللها : بس انتى بيئه

الناس اللى بتشيل اكياس ، كفايه منظر يجيب اعياء يا جماعه ، ليه رايحين جايين باكياس قزاز الاخضر ، علشان تقولوا احنا كنا فى السعوديه ، طب ليه اكياس التوحيد و النور ، طبعا علشان تتأكدوا بنفسكوا انكم فى مصر ، بيئه مووت

الشباب اللى بيلبس كذا طبقه فوق بعض و استيك ، يعنى فنله و تى شيرتان و بلوفرين و يضرب شعره جاز علشان يعمل شغل للبنات لما يلاقوه بيلمع و كمان بالمره هاى لايتس فى الشعرات اللى ادام ، يطلع لونه برونزى يطلع لونه نحاسى مش مهم ، و ينتف شنباته و دقنه علشان الدقن الخفيفه موضه مش مهم ، المهم ابقى بيئه ، خليك بيئه احسن

تمشى فى البيت بشبشب 02 اوك ، تروح تصلى بشبشب 02 ماشى ، بس تخرج مشاويرك بشبشب 02 ، نو كومنت ، كفايه بقت شباشب 02 علامه المصريين التجاريه فى كل بلدان العالم ، و خاصه البلدان العربيه ، يعنى ابقى واقف على الرصيف ، و الاقى على الرصيف التانى حد لابس شبشب 02 ، اعرف انه مصرى فألف عالطول و اديلوا ضهرى و اهرب ، حاجه بيئه مش كده

كل شاب و شابه واقفين ادام كورنيش مبنى التلفزيون و بيقزقزوا لب اتنينات اتنينات حاجه بيئه ، عملين زى استمبات مغلفه محنطه محطوطه على سير بيطلع منتجات بيئيه من مصنع الالبنان المستحلبه ، ياخ ياك ياك ، بيئه بيئه

اروح النادى المهبب على عينه اللى بيسمح لستات اوزان ما فوق الارقام القياسيه تنزل بالجلابيه السوده البيسين و تخللى البيسين لونه اسود فى اسود ، و البيسين يبقى مليان حاجات تانيه لا اعلم عنها شىء و لكن من الممكن ان اشمها ، او اتذوقها ، بيئه كيك

لما بلاقى حد ادامى لابس جاكيت و مابسوط بيه علشان عليه علامه صحين ، و بنطلون ترينج عليه اربع اهرامات ، بصراحه بيصعب عليه ، بيئه خالص

و لما اروح فرح و الاقى الراجل لابس بدله اخضر و جرافطه مليانه ورد بامبى و بنطلون ابيض ، و مراته واقفه جنبه عمله الحجاب دش و بالقمر الصناعى بتاعه فوق راسها ، و مخلصه المكياج بتاعها فى وشها ، و حطه كل بودره التلك على خدها و وشها بقى اكثر بياضا من الثلج بتاع القطب الشمالى ، و الفستان لا استطيع ان اوصفه ، الذى استطيع ان اوصفه هوه الكرش الذى يلمع بالخرز ، بيئه يا ماما

انا لو قعدت اكتب مش حاخلص ، معظم الحاجات بقت بيئه فى مصر ، البيئه حاتخنقنى ، خلاص مش قادر ، الحاجه اللى فضلالى هوه انى اجرب اكون بيئه ، يمكن اكون انسان جديد، مش كده برضك ،اده يااى ، اتعديت و بقيت بيئه ، اسمها برضو