محتاج حد يسمعنى سمعت حد محتاج يسمعه

خلاص ، مش قادر ، تعبت ، تعبت جدا ، مش طايق حد ، مش طايق الدنيا دى خلاص ، أنا مش عارف اعمل ايه ، مش فاهم ايه اللى بيحصل ، انا عمرى ما عليت صوتى على امى بالطريقه دى ، زعقتلها جامد ، مش قادر استحمل خلاص ، قولتلها مش قادر اشتغل و فى نفس الوقت احضر للماجيستير ، قالت لى سيب الشغل ، سيبته تروح قايلالى انت سيبت الشغل ليه ، و منين حتجيب فلوس ، ده انا بموت كل يوم فى المواصلات ، عايش فى حته مقطوعه اسمها 6 اكتوبر ، حته مافيهاش حد ، حته مهجوره و ما فيش غير كلاب ضاله ماشيه فى الشارع ، و بتاع السوبر ماركت بيقفل الساعه تسعه بالليل ، ده انا نقلت من الهرم ل6 اكتوبر بس علشان امى كانت عاوزه تعيش فى هدوء ، و الوقتى انا كل يوم باتبهدل فى المواصلات ، مافيش غير ميكروباص هوه اللى بيوصل للبيت ، و الميكروباص مالهوش مواعيد و لما يجى الناس كلها عاوزه تركبه ، لازم اروح اخده من ميدان الجيزه ، انا بادفع 20 جنيه مواصلات فى اليوم ، و كل ده علشان مرتب ب200 جنيه، اعمل ب200 جنيه دول ايه ، و بعدين عندى الجيش من اول يناير و مش عارف حاخد اعفه و لا لأ ، و بعدين لو دخلت الجيش لازم اقعد 3 سنين هناك ، و عارف حيدولى كام ، 80 جنيه فى الشهر ، يعنى تقريبا 2 جنيه و نص فى اليوم ، يعنى اكل بجنيه و اتغدى بجنيه و اتعشى بنص جنيه ، كويس انى حبطل وقتها السجاير ، المشكله ان الحمل بقه عليا كبير ، تقيل ، مش قادر خلاص ، ده انا نقلت انا و امى من شقه الهرم ل6 اكتوبر علشان اخويه الكبير يتجوز فيها ، و اخويه ما بيسألش عليه خالص ، مابنشفهوش ، هوه فين ، مش امى مسئوليته برضه و بعدين ده هوه الكبير ، عملت انا ايه بالشهاده بتاعت الجامعه ، واحد خريج كليه تربيه رياضيه و مش لاقى شغل ، انا حاسس انى ولا حاجه ، انسان مالهوش قيمه ، كان نفسى ابقى ضابط ، روحت قدمت ورقى مع اكتر من 1000 واحد و انا عارف انهم مش حايخدوا غير 10 ، و اللى جاى معاه واسطه و اللى معاه حد سانده ، و انا كنت واقف فى الطابور علشان اسلم الورق لوحدى و انا عارف انهم مش حايخدونى ، انا لوحدى ، ابويا مات و ماليش سند

- و بدأت عينيه تمتلأ بالدموع

قال الاستاذ فى الكليه بيضحك و يقوللى هوه انت فاكر انك حتتعلم حاجه بالماجستير اللى انت بتعمله ده ، ده شويه ورق و شهادات مالهاش قيمه خلاص فى الزمن ده ، شوفت ، انا ماليش اى قيمه ، و يقوللى كمان رايح تضيع 200 جنيه مصاريف دروس انجليزى فى الجامعه الامريكيه ، ده انت كان ممكن تصاحبلك بت اجنبيه و تربط منها شويه كلام انجليش ، طب سيبونى اسافر ، مش عاوز اقعد فى البلد دى ، كل حته اروحه أو عاوز اقدم لشغل يقوللك عاوزين موقفك من التجنيد ، عاوزينك تخدم وطنك ، اخدمها على ايه ، هيه عاملتلى ايه الوطن ده علشان اضحى نفسى عشانها ، مش عاوز ادخل الجيش ، مش عارف اروح حته ، حاسس انى مسجون و مالناش حد فى عيليتنا بيسأل علينا ، انا ماليش اهل من اساسو ، ماليش ، ده اخويه من بعد ما اتجوز و هوه اكنه مالهوش ام و لا اخ ، قاعدلى بس هناك فى الشقه ين**ك فى مراته و سايبنى فى اللى انا فيه ، قال البت فى النادى بتقوللى انت عارف ليه انا مش عاوزه ارتبط بيك، علشان انت مدرب رياضه ، قال مدرب رياضى بقت شتيمه
- و سقطت دمعه من عينه
انا ولا حاجه ، زيرو ، مش عاوز اشوف اى بت تانى ، خلاص مابقاش ليه نفس خلاص ، انا مش قادر اعيش فى الشقه بتاعت 6 اكتوبر دى ، انا احسنلى اعيش فى بيوت الشباب ب5 جنيه فى اليوم عن البهدله اللى انا فيها دى ، انا لازم ابيع المحل ، دى الحاجه الوحيده الى انا وارثها من والدى الله يرحمه ، بس انا مش عارف ابيع المحل ده ازاى ، معنديش خبره فى الحاجات دى ، و ادورلى على شقه ايجار أو تمليك ، و امى بقه عليها تختار ، إلا تيجى إلا ماتجيش ، طول النهار تقوللى اقعد معاها ، علشان قال ايه حاسسه بالوحده ، و بعدين لما اقوللها انى محتاج فلوس تقوللى مش انت اتخرجت خلاص ، انت بقيت راجل ، روح شوفلك شغلانه ، انت عارف انا تعبان ليه كمان ، علشان مش لاقى حد اقول له اللى جوايه ، كل صحابى مش موجودين و انا فى الوضع اللى انا فيه ده ، انا اكتشفت على فكره ان كل صحابى مصاحبيننى علشان مصلحه ، حاجه تقرف يا اخى ، انت مش عارف ريحتنى ازاى لما حكيتلك اللى جوايه ، كفايه انك سمعت اللى عندى ، ما تتخيلش ازاى انا مبسوط دالوقتى ، انا مش باين عليا علشان انا بقالى 3 تيام ما نمتش ، بس انا نفسيتى اتحسنت من قعدتى معاك ، مش لاقى اى هدف فى حياتى خلاص ، انا حاسس بوحده شديده ، انا مش قادر خلاص ، تعبت جدا من اللى انا فيه ، بتعذب كل ساعه و كل ثانيه و كل يوم ، بررر ، الجو برد جدا ، يلا بينا نقوم نتمشى شويه

مقطتف من حسو و هوه بيفضفضلى امبارح الساعه اتنين بالليل فى النادى