زباله تى فى

بصراحه التلفزيون المصرى والعربى بقه زفت ، زفت زفت زفت ، مافيش حاجه عدله الواحد يتفرج عليها ، بالذات لما جه شهر رمضان ، قمه التفاهه التلفزيونيه ، لما الواحد بعد الفطار يعمله كده كبايه شاى و ياكله حته بسبوسه مع بلح الشام ، نفسه يفتح التلفزيون و يتفرجله كده على حاجه لذيذه تسليه شويه ، مش القرف اللى بيشوفه كل لما بيفتح التلفزيون المصرى ، يعنى مش كل لما اجى اركز مع الاعلانات يروحوا قطعينوا بإعلان ، قال كنت باتتريأ على البرنامج التافه الى بيقدمه حسين فهمى ( الناس و أنا ) ، بقيت مش لاقى حاجه عدله تانيه أفطر عليها غيره ، اصل أنا ماعرفش افطر كده لوحدى على ترابيزه و اتفرج على الحيطان اللى حوليه ، اهة حاجه تسليه و السلام ، و بعدين العبط الازلى اللى عمله حسين الامام ده ، نفسى اعرف اللى ألف البرنامج ده كان بيعمل ايه لما كان بيألفه ، اظن انه كان فى وضع مش ولا بد كده ، و يا سلام على الظرافه اللى فى تامر و شوقيه ، بالمناسبه هوه ايه اللى فحل احمد الفيشاوى للدرجه دي ، نفسى اقول لكل واحد فى المسلسل الظرافه ده ، يا ظرييييف ، و بعدين يجولى بتوع البيت مش بيتك و ليلى علوى و النور و الصبح و بالليل ، لما بحس اننى خلاص حولع فى نفسى بروح قالب عالطول على القنوات العربيه التانيه ، الاقى عيال شحتين فى مسلسل و حنان ترك فى دور ساره بس بعقل بقه و ناس مشوهه ، هوه أنا ناقص اشوف فى رمضان حاجات توجع القلب و شوارع و وساخه ، و تيين ادج فيفى عبده و البوى فريند بيبيعوا بطاطس فى سوق الخضار ، انا عاوز حاجه خفيفه كده لايت تبسطنى و كل افراد عيلتى ، مافيش افراد اساسا ، يعنى اتخيل كده ان عندى افراد عيلتى و نتلف حولين التلفزيون لمه يعنى، أعت عشر تيام ادور على المسلسل بتاع تيته ورده ابو مليون جنيه لغايه ما جبته ، و ياريت ما جبته ، و اربعتاشر يوم لغايه ما وصلت للحاجه سهير و اخواتها ، و اول لما وقعت غلط على قناه فيها عبله كامل اتبصت ، اصلى بحب عبله كامل ، بس انبصاتى تلاشى تماما لما لقيت الواد بتاع كليب عصابه اشباح العندليب طلعلى كده خبط لزق بحواجب و آى لاينر ، بيطبطب على كل واحد معاه فى المسلسل ، الواد صعب عليه يا جماعه ، بجد صعب عليه مووت ، اروح راجع عالطول على الاراضى المحليه الاقى تيسير و تامر بلوند بادى تانى ، و عراق و امريكا و حاجات كده كانت حاتجبلى انسداد فى المسالك البوليه ، قلبت عالطول على حاجه تانيه لقيت مين ، يا ترى لقيت مين ، ممم ، منى زكى فى دور السندريلا ، سيبك من المسلسل التاريخى التسجيلى ده و ركز فى اللى جى ، تا تا تا تان ، مدحت صالح فى دور العندليب ، ايوه العندليب برده ، انا اول لما شفته سخسخت من الضحك ، ايه يا مدحت اللى انته عامله ده ، مين اللى اقنعك تعمل ده ، بلاش مين ، ازاى اقنعك انك شبه ، بلاش شبه ، انك تقدر تقلد العندليب ، انا كنت حاطت آمال كبيره على مسلسل يحيى الفخرانى سكه الهلالى ، بعد الفشل الزريع السنه اللى فاتت ، بس المسلسل مش نازللى من الزور ، بطىء بطىء بطىء ، حدائق الشيطان حلو بس انا زهقت من مسلسلات الصعايده و الفلاحين ، أه فكرتونى ، فين ماما يسرا ، محدش شافهه فى قناه هنا و لا هنا ، فى مسلسل بجد عاجبنى ديكوره و ملابسه و تصويره ، مش عارف اسمه ايه ، انا بتهيألى انه سورى، و فى مسلسل خالد بن الوليد اوك بس انا مش من هواه المسلسلات التاريخيه ، يادوبك المسلسل الوحيد اللى الواحد اهوه يقدر يتفرج عليه هو حضره المتهم أبى ، سريع و مثير بالرغم انه خيالى شويه ، مأفوريين فى حاجات كتير حبتين شويه ، و الواد ابن نور الشريف ، قصدى ابن المؤلف بتاع المسلسل جابللى بواسير، بس دى غلطه المخرجه رباب انها معرفتش تعمل كنترول على الممثليين اللى معاها ، زينه انتى بتفكرينى ببنوبلى كروز بس على فلاحى ، نفسى ابقى زى هنا و خالد ، بصراحه التلفزيون عاوز يتنفى من البيت تماما ، فين الحاجات الجميله بتاعت زمان ، لن اعيش فى جلباب ابى و العائله و ليالى الحلميه و المال و البنون و من الذى منه ، فين فوازير شريهان ، و الف ليله و ليله الجميله بتاعت شريهان و نجلاء فتحى ، فين اول مره كاميرا خفيه ، و فين لما الممثلين كانوا بيلعبوا افلام فى بدون كلام ، طب فين بوجى و طمطم ، طب تصدق أن بوجى و طمطم ارحم ، بصراحه احنا بجد كان لازم ناخد جرعه مكثفه تطفيشيه فى رمضان علشان نسيب التلفزيون الهبل الهبوللى اللى لحس مخنا و جابنا لورا مش لقدام ... و يلا باى