World Cup 2006 in Egypt

اولا نود أن نشكر شيخ القنوات الفضائيه على حركه التشفير و الاحتكار النص كم و اتاحه الفرصه للمشاهدين الغلبانين الكحيانين اللى زينا اننا نتجمع فى الحلوه و المره و نقعد فى الحوارى و الشوارع و القهاوى و الكوفى شوبات و النوادى نتفرج على ماتسات الكويه... قال كنا عاوزين ننظم كاس العالم 2010 فى مصر ... كاس العالم ايه و بتاع ايه... بلاش السيره دى لحسن احنا اولردى متعكننين بحكايه التشفير دى... ياله كفايه علينا عملنالنا مونديال صوغنون على قدنا و سمناه البطوله الافريقيه و رسمنا على وشوشنا اعلام مصر و رحنا الاستاد و هيصنا و كسبنا البطوله و شلنا الكاس و هيييه... و برافو... الوقتى بنتفرج على الكوره اللى بجد و بحق و حقيقى... مش لعب العيال بتاعنا و خطط اتدلع يا لعيب...قال الاهلى و الزمالك و مرتضى ... و عاملين اكنها نهايه الكره الارضيه ... زمالك ايه و اهلى ايه و مزارع ايه بس... ده كويس اللى احنا ملعبناش فى كاس العالم ...دى كانت تبقى حوسه كوسه... و كنا اتفرجنا على تكسيح و اباده للمنتخب القومى... كان ممكن برضه ندخل موسوعه جينيز للارقام القياسيه و خسرنا كده تمانيه صفر أو عشره صفر ... يلا ننسا همومنا و مشاكلنا و نركز بقه على المونديال اللى جاى من دلوقتى ... و عاوزين نعمل جمعيه من الدخل القومى المصرى لإعداد و تجهيز المنتخب الوطنى معنويا و ماديا .. . و عاوزين نشترى اغلى مدرب اجنبى و نسمى اللعيبه بتوعنا اسامى شيكسى شويه... زى ميدو كده... ايه متعب ده... و ايه حضرى ده... عاوزين نسميه مثلا حضريكو أو حضرونالكو... و مش عاوزين نضيع مجهودنا اللى فاضل بقه فى كلام فارغ و اصلاح و تهذيب و ديموقراطيه ... خلينا فى الكويه احسن... ده اللعب برضه فن و هندسه ... و لو ماكنش فى كويه قدم على كوكب الارض ... كنا انقرضنا من زمان