لأ و الله

قولت للراجل بتاع التاكسى بعد ما وصلنى: معاك فكه خمسه جنيه
الراجل: لأ و الله
قولتله: طب معاك كام
قاللى: معيش حاجه
قولت: معقول معكش اى فلوس
قال: ايوه…مأصل انا قولت حيجيلى فلوس من الزبون
قولت: يعنى ينفع حد ينزل من البيت و هوه معهوش اى مليم…افرض ان البنزين خلص
قال: خلاص يبقى ربنا عايز كده
واحده بتشحت: حاجه لله
قولت: طب استنى لما ادى للراجل فلوسه الأول…استنى هنه بقه لما اشوف فكه
قولت لراجل واقف فى الشارع: الاقى مع حضرتك فكه خمسه
الراجل: لأ و الله
لست ماشيه فى الشارع: الاقى مع حضرتك فكه خمسه
الست : لأ و الله
لتلت بنات ماشيين فى الشارع: الاقى مع اى حد فيكم فكه خمسه
البنات: لأ و الله
لكاشير فى كافيه: معاك فكه خمسه
الكاشير: لأ و الله
لراجل بيشتغل فى محل ملابس للرجال: الاقى مع حضرتك فكه خمسه جنيه
الراجل : لأ و الله
اعت اسأل كذا واحد و اعت اعدهم و كله بيقول: لأ والله...اكنهم عايزين يقولولى:لأ مش معانا+هو انت مش مصدقنا...طب و الله العظيم مش معانا...باختصار علشان كل واحد مشغول = لأ والله...احتماليه 67 % انى احنا بنرد على هذا السؤال بهذا الجواب بدون وعى = احنا اتعودنا نرد كده
رحت للراجل بتاع التاكسى و اعت جنبه و قولتله
سألت خمسه و عشرين بنى ادم ماشى فى الشارع و ولا واحد فيهم معاه فكه خمسه جنيه…ولا واحد فيهم معاه فى جيبه شويه جنيهات أو انصاص جنيه…اصل احنا شعب غنى مابنشلش إلا بالعشرينات و الخمسينات و الميات
الراجل بتاع التاكسى: خلاص يا بيه…خليها عليه المرادى
قولت: انت عارف…طول محنه كده كسلانين و مش عاوزين نساعد بعض…حنفضل فى اللحنه فيه ده
الراجل بتاع التاكسى: هوه احنه فى ايه… بس ممكن فعلا محدش يكون معاه فكه
قولتله: بص…انا حسأل خمسه كمان و لو مافيش ممكن نروح بعدها لبنزينه ادام نفك
سألت راجل فى الشارع: لأ و الله
سألت الشحاته فى الشارع على فكه خمسه بصتلى بأستغراب و اندهاش و قالتلى: لأ و الله
وقفت ميكروبص ماشى فى الشارع قاللى : انت مش حتركب
بصيت على الفكات الكتير اللى فى ايديه و قولتله: معاك فكه خمسه
مردش عليه و مشى
وقفت تاكسى و قولتله: انت اخر واحد…معاك فكه خمسه
قاللى: لأ و الله
مشيت بعيد لغايه سوبر ماركت و قولت للبياع: الائى معاك فكه خمسه
قاللى: لأ و الله
قولت له: طب انا حشترى حاجه
قاللى : برضه معيش فكه خمسه
لقيت راجل عجوز شكله صاحب السوبر ماركت سألته عن فكه خمسه
قاللى: استنه كده لما اشوف
و طلع كل الفلوس اللى معاه و كان بينهم جنيهات فكه ادهالى
قولتله:الف الف شكر…انت الفائز معانا النهارده…لازم اخدلك صوره
الراجل العجوز اتبصت
رجعت للراجل بتاع التاكس و ادتله تلاته جنيه
الراجل بتاع التاكسى مشى و هوه بيبتسم
ياترى لو حد سألنى على فكه بعد كده حقوله ايه