3 YEARS EGYPTOZ

اول حوار مع ولد شاب صاحب مدونه ايجيبت طظ بمناسبه مرور 3 سنوات على انشاء المدونه

وايتيكاى: فى البدايه نحب تعرفنا عن ولد شاب ، مين ولد شاب؟
ولد شاب: ولد شاب ولد شاب
وايتيكاى:لأ مش من اولها كده ، لأ بجد انت مين، عندك كام سنه، ساكن فين، بتدرس و الا بتشتغل، متجوز و الا عازب؟
ولد شاب:بصى ، اول ما بدأت المدونه كنت عاوز اخليها صفحه خاصه ليه ، ادون فيها افكارى ، اتكلم فيها مع نفسى على راحتى ، و كنت وقتها ممكن اكشف عن نفسى ، بس حاسيت إن الموضوع ده حايخنقنى ، مش حاعرف اقول اللى بقوله دالوقتى ، و اهو الموضوع كمل، بس عـا
وايتيكاى:يعنى لغـايه
ولد شاب: بس عارف إن نهايته قربت
وايتيكاى:يعنى لغايه دالوقتى ما حدش يعرف انت مين؟
ولد شاب:لأ فى ناس عارفه
وايتيكاى:كام واحد
ولد شاب: مش عارف ، بتهيألى خمسه
وايتيكاى: و همه متابعين للمدونه بتاعتك؟
ولد شاب: مش عارف برضو ، اكيد مش كلهم ، من تلات سنين لما قلتلهم انى عندى مدونه
وايتيكاى:ايجيبت طظ ،جاتلك منين فكره الاسم ده؟
ولد شاب:من زمان و انا عاوز اسيب مصر، بكرهها بشده ، و ناس تقول لى ليه ، اقول لهم علشان كذا و كذا و كذا ، و قولت ليه ما اكتبش فى المدونه عن كل الاسباب اللى مخليانى عاوز اسيب مصر ، و اقول لهم بصوا ، عاوزين تعرفوا عايز اسيب مصر ليه ، اقروا ايجيبت طظ ، بس انتى عارفه، بعد سنه من الكتابه حاسيت إن مصر دى حلوه اوى ، و المشكله مش فى مصر ، المشكله فى الناس اللى عايشه على ارض مصر
وايتيكاى:و حاتحتفل بكره بعيد ميلاد المدونه ازاى؟
ولد شاب:لغايه الوقتى ماعرفش ، ممكن اخرج مع صحابى ، ممكن اقعد فى البيت ، و حانشر الحوار ده اكيد
وايتيكاى:تلات سنين مده طويله ، هل كنت تتخيل إنك تقعد المده دى كلها؟
ولد شاب:بصراحه لأ...كنت فاكر حادون شهرين تلاته و ازهق
وايتيكاى:طب عاوزينك تحكلنا ازاى ابتدى معاك موضوع التدوين؟
ولد شاب:ياااه ، بتفكرينى بوقت كان صعب اوى عليه،كنت مخنوق مالبيت،و وقتها سيبت اهلى و روحت عيشت فى شقه قديمه،و يوم ما ابتديت ادون كان تانى يوم بعد نهايه علاقه حب طويله، و كنت متأثر جدا وقتها،و كنت حاسس بوحده شديده، و بادور بأى شكل على حد اتواصل معاه على شبكه الانترنت، بدأت بغرف الدردشه ، لغايه ما اكتشفت مدونه منالا، و شعرت بإن ليه اسره تانيه، بالرغم من انى عمرى ما شوفتهم و الا اعرفهم، كانوا عاملين مدونه بيحكوا فيها عن حياتهم و حاطين صورهم الخاصه كمان، قولت ليه ما اعملش مدونه انا كمان و احكى فيها عن يومياتى
وايتيكاى:قصدك مدونه علاء و منال
ولد شاب:ايوه
وايتيكاى:و قابلتهم فى الحقيقه بعد كده؟
ولد شاب:تتصورى لأ، مع انى شوفت علاء كذا مره من بعيد زمان ايام المظاهرات بتاعت وسط البلد
وايتيكاى:انا ملاحظه فعلا انك فى اول المدونه كنت بتكتب كتير ، تقريبا كل يوم ، ايه اللى حصل؟
ولد شاب:اه فعلا، انتى عارفه لما الواحد يكتشف حاجه جديده و يبقى مبسوط بيها،بيدمن عليها،و انا كنت مدمن تدوين، كنت فاكر حابقى صحفى و اغطى اخبار المنطقه،ايام العبط بقه،بس بعد فتره زهقت،و فى اوقات كنت عاوز اوقف زى فى عيد ميلاد المدونه التانى ، و كنت
وايتيكاى:ده انت الوقتى بقيت بتكتب موضوع او موضوعين فى الشهر
ولد شاب:ايوه،ما انا كنت عاوز اقول إن الاول كان التدوين بتاعى عامل زى اليوميات الشخصيه،بعد كده بقيت بتكلم عن كل حاجه
وايتيكاى:و كان ايه السبب انك عاوز توقف تدوين؟
ولد شاب:اسباب شخصيه ، احيانا كنت باشعر إن حياتى بقت المدونه و مش الحياه الحقيقيه،عايش جوه اوضه و قافل على نفسى و باكلم نفسى
وايتيكاى:هل انت شايف بفرق فى مدونتك زمان عن دالوقتى؟
ولد شاب:مش فاهم السؤال ،فرق فى ايه؟
وايتيكاى:يعنى شايف إن زمان كان فى متعه فى التدوين اكتر، ناس بتدخل اكتر
ولد شاب: و الله انا قلت كذا مره فى المدونه إن موضوع الناس تدخل على المدونه موضوع مايهمنيش اوى على قد ما يهمنى انا باكتب ايه،اصل انتى عارفه التدوين ده بيعمل عندى اشباع خاص،و فى السنه الاخيره بقى يهمنى الكيف عن الكم،المضمون يعنى،علشان اكون صريح معاكى،انا برضوانشغلت فى الفتره الاخيره عن التدوين،بس لو فى حاجه عاوز او لازم اقولها ، حاكتب عنها عالطول
وايتيكاى:هل التدوين اثر فى حياتك؟
ولد شاب:بالتأكيد،اولا خلانى احس إن ليه معنى و صوت ممكن يوصل لكل العالم،و بعدين خلانى اطلع حاجات كتيره جوايه كنت حانفجر أو اتجنن لو ما كنتش طلعتها ، كنت فاكر، و على فكره لغايه الوقتى باؤمن إن ممكن كلمه او جمله كاتبها تأثر فى حد ما عرفوش ، و علشان كده حبيت فكره التدوين
وايتيكاى:بالمناسبه ليه فى بوستات باللغه الانجليزيه و بوستات باللغه العربيه؟
ولد شاب:مزاجى بقه
وايتيكاى:طب انا ملاحظه إنك فى كل بوست تقريبا بتضيف ليها صوره او اكتر من صوره،هل فى سبب معين؟
ولد شاب:لأ خلينى ارد على السؤال اللى قبليه الاول،بصى فيه مواضيع باحس إنها تنفع بالعربى احسن،و فى مواضيع ما تجيش غير بالانجليزى،و بعدين فى ناس مالعالم ممكن تدخل على المدونه، الحاجات اللى يهمنى الناس بره تقراها و تفهمها،باكتبها بالانجليزى،و الحاجات اللى يعنى ما يصحش تطلع بره، و خليها احسن بينا و بين بعض، تبقى بالعربى ، و ساعات بمزاجى
وايتيكاى:و فكره الصور؟
ولد شاب:اه الصور، بصى، مش حاقولك بقه اصل انا من زمان و انا باحب التصوير و كده،من الاخر انا ما بحبش افتح كتاب و الاقى كله كلام من غير صور،و المدونه بالنسبالى عامله زى كتاب و فيه صور
وايتيكاى:هل بتفكر فى يوم من الايام انك تحول مدونتك كتاب زى بعض المدونين ما عملوا؟

ولد شاب:ممكن،مش عارف،بس حاسس انها فكره غبيه
وايتيكاى:و ليه ما بتستخدمش زى فى بعض المدونات فيديو و موسيقى و وسائل اخرى غير الصور؟
ولد شاب:مش عارف،ما انا قولت لك المدونه عامله زى كتاب، على فكره ممكن فى المستقبل ابقى استخدم فيديو و موسيقى و كده ،بصى مش عارف
وايتيكاى:و ليه بتكتب بالعاميه؟علشان يوصل للناس اسهل؟
ولد شاب:لأ فى مواضيع كاتبها برضو باللغه العربيه الفصحى،و برضو بتقوليلى الناس، انا ما يهمنيش يفهموا و الا ما يفهموش
وايتيكاى: هل ممكن علشان انت ضعيف فى اللغه العربيه الفصحى؟
ولد شايف:ايوه عنديك حق،انا ضعيف فى اللغه الفصحى
وايتيكاى:ماشى يا ولد شاب، على فكره فى ناس بتقول انك عندك نوع من حب الذات
ولد شاب:انتى عندك مدونه؟
وايتيكاى:ايوه؟
ولد شاب: اسمها ايه؟
وايتيكاى:ما تهربش من الموضوع
ولد شاب: لأ قول لى بجد اسمها ايه؟
وايتيكاى:لأ مش دالوقتى، رد بقه على النقطه دى
ولد شاب:بصى ده رأيك و رأيهم، اللى يعرفنى كويس يعرف انا عندى حب الذات اللى بتقولى عليه ده و الا لأ
وايتيكاى: و بالذات انك فى اخر بوستات ابتديت تتكلم بلهجه إن الناس مش فاهمه و ما بتستوعبش كلامك و محتاجين يتنوروا و يتعـ
ولد شاب: شوفى بترجعى لموضوع الناس ده ازاى،خلاص انا اذكى واحد فى العالم
وايتيكاى:مش انا اللى برجع، انت اللى كاتب كده، ممكن تشوف بنفسك انت كاتب ايه
ولد شاب:انا فاهم انتى قصدك على ايه،اصل انا متنرفز بصراحه من إن ناس كتيره بقت سطحيه و ما بتدورش ايه اللى ورا الموضوع، ما بتحاولش تعمل مجهود انها تفهم و تتعمق
وايتيكاى: ايوه ايوه
ولد شاب: فحابيت اساعد اللى بيقرا إنه
وايتيكاى:ايوه،طب قول لى إيه
ولد شاب: شوف انتى بتقاطعينى ازاى، انا قاطعتك و انتى بتتكلمى
وايتيكاى:اتفضل اتكلم
ولد شاب:اكيد انا عارف إن فى ناس بتقرا اللى باكتبه، بس من التعليقات اللى بيكتبوها حاسيت إن المعلومه او الفكره اللى باكتب عنها ما بيفهاموهاش
وايتيكاى: طب ما فاكرتش إنك انت اللى مش عارف توصل الفكره للى بيقروا مدونتك
ولد شاب:ممكن برضو، ماشى يا وايتيكاى ، ايه الاسم ده؟

وايتيكاى:قول لى إيه الموضوع اللى لسه عاوز تكتب عنه قريب؟

ولد شاب:انتى عارفه بتحسسينى بإيه،بممثل تافه قاعد ادام المذيعه و بتسأله إيه الدور اللى نفسك تلعبه و لسه ما لعبتوش،انا فى مواضيع كتيره كتبت عنها و ماتنشرتش،بيبقى معايه قلم و ورقه و لما يجي حاجه فى بالى بكتب جمله عنها علشان عندى ازمه ميمر
وايتيكاى:طب حاسألك عن حاجه تانيه، قول لى إيه اكتر موضوع كتبته و اثر فيك؟
ولد شاب:ايه اكتر موضوع كتبته و اثر فيه؟ سؤال غريب بس حاجاوب عليه، فى موضوع كان عن صديق عزيز ليه توفاه الله اسمه كريم،و الموضوع ده حتى مش فاكر بس متهيألى ما حدش علق عليه حتى،و موضوع يموت و يحيى،الموضوع ده برضو كان صعب عليه اوى،صعب كمان فى كتابته، و مواضيع تانيه كتير،زى موضوع البنت اللى كنت باحبها و سابتنى ، و لما صاحبى اتقبض عليه و دخل السجن ، و لمـ
وايتيكاى:و إيه اكتر موضوع كنت فاكر إنك حايجيلك عليه تعليقات كتيره و ما جالكش
ولد شاب: هوه ده برضو ، الموضوع بتاع كريم اليتيم
وايتيكاى:و ايه اكتر موضوع بعد ما كتبت عنه،ندمت عليه و كنت عاوز تمسحه؟
ولد شاب: ما فيش اى موضوع اتنشر و ندمت عليه،لو فى موضوع حاندم عليه بعد ما انشره يبقى مالهوش لازمه من الاول انى انشره
وايتيكاى:و موضوع فلسطين
ولد شاب:اااه ،انا فهمت انتى قصدك على ايه، و على فكره مش عاوز اتكلم عن الموضوع ده
وايتيكاى:ماشى ولد،اكيد سمعت عن فكره إنك بتفبرك القصص اللى بتكتبها
ولد شاب: لا تعليق
وايتيكاى:ولد شاب، احنا مش جايين نعمل الحوار ده علشان نقول لا تعليق
ولد شاب:بصى بقه،تقريبا كل المواضيع اللى كاتب عنها يا إمه حصلت ليه يا إمه حصلت لحد اعرفه، بس كلها حقيقيه
وايتيكاى:و كمان اسلوب الكتابه بتاعتك و اختيار المواضيع ،بتحب تعمل انت بيها اثاره
ولد شاب: اللى عاوز يدخل المدونه بتاعتى يدخلها هوه حر، انا ما باغصبش على حد يدخلها،اثاره مين بقه؟
وايتيكاى:و مواضيع كتيره استخدمت فيها الفاظ تخدش الحياء و مصطلحات جنسيه
ولد شاب:زى ما قولت لك ، انا باكتب زى ما انا عاوز اكتب، على مزاجى ، ما تزعليش منى بس دى مدونتى و انا حر فيها، فاضل اسئله كتير
وايتيكاى:ممم، طب ايه السبب وراء اختيار اسم ولد شاب؟
ولد شاب: سر
وايتيكاى:بص شخصيتك حاتبان من اسلوبك فى الحوار، كنت فاكراك حاجه تانيه ، و فكره الغموض اللى انت عايش فيها فاكر انها حاترجع لك بفايده ، بس مش بتضحك على حد غير على نفسك
ولد شاب: ايه السؤال ده؟
وايتيكاى:خالينا نروح لموضوع مهم،اكيد سمعت عن المدونين اللى اتمسكوا و اتحبسوا بسبب ارائهم السياسيه أو الدينيه و خاصه اللى بتعارض الحكومه
ولد شاب:ايوه و بصراحه
وايتيكاى: انا لسه ما قولتش السؤال
ولد شاب: ماشى
وايتيكاى:هل ممكن تتخيل انك فى يوم تتمسك بسبب آرائك فى المدونه؟

ولد شاب: ـ
وايتيكاى:ايه؟ما قولتش حاجه
ولد شاب:آه،ليه لأ،اى حد فى الزمن ده ممكن يحصل له اى حاجه،ساعات فعلا كنت بسأل نفسى، هل الكلام اللى انا كاتبه ده ممكن يعمل حاجه،ممكن يضايق حد،علشان كده بحاول بقدر الامكان إنى ماجرحش حد
وايتيكاى:و ايه رأيك عامه فى موضوع القبض على المدونين؟
ولد شاب:اكيد طبعا لازم كل واحد له مدونه انه يكون ليه الحريه الكامله فى التعبير عن رأيه،بس فى ناس بتزودها حبتين
وايتيكاى:زى مين؟
ولد شاب: همه عارفين نفسهم
وايتيكاى: و انت ما بتزودهاش؟
ولد شاب:لأ ما بزودهاش
وايتيكاى:هل فيه مدونات معينه بتابعها؟
ولد شاب:لأ
وايتيكاى: و الا مدونه؟
ولد شاب:حاتقولى لى إيه الغرور ده ، يعنى ساعات بقرأ شويه مدونات
وايتيكاى:يعنى سمعت عن الوعى المصرى
ولد شاب:ايوه
وايتيكاى:و ايه رأيك فيها؟
ولد شاب:كويسه
وايتيكاى: كويسه،اوكيه، و رأيك ايه فى حركه الصحافه الشعبيه أو التدوين عامه فى مصر؟
ولد شاب:زمان كنا قليلين، الوقتى بقيت حاسس إن كله بقى عنده مدونه،مش عارف، الموضوع بقى مالهوش طعم،اهو كلام و خلاص، رغى و فضفضه،بس فى مدونات فعلا بتكشف عن حقائق و بتقول عن اخبار عمرنا ما كنا حانعرفها من غيرها

وايتيكاى:شوفت قبل كده مدونين فى الحياه الواقعيه؟

ولد شاب:ايوه كتير،فى بعض لقاءات المدونين ، بس متهيأليش انهم كانوا عارفين انى ولد شاب بتاع ايجيبت طظ
وايتيكاى:طب هل انت راض عن مدونتك؟
ولد شاب: الحمد لله
وايتيكاى:كام فى الميه؟
ولد شاب:مش عارف،ممكن 70 فى الميه
وايتيكاى:كنت فاكره حاتقول 99 فى الميه
ولد شاب:طب انتى تدى كام فى الميه للمدونه بتاعتى؟
وايتيكاى:ممم،60 فى الميه
ولد شاب:طظ فيكى
وايتيكاى:شوف اسلوبك فى الحوار مش ظريف ازاى،حاول تتقبل النقد يا ولد يا شاب
ولد شاب:نقد ايه،هوه انتى نقدتى خالص، انتى قولتى 60 فى الميه و سكتى ، انا بهزر معاكى على فكره
وايتيكاى: طيب و شايف مدونه ايجيبت طظ بعد خمس سنين حاتبقى شكلها ازاى؟
ولد شاب: الله اعلم،ممكن ابقى مت
وايتيكاى:اااه،فكره الموت دى مسيطره على كتير من بوستاتك، ايه السبب؟
ولد شاب:ممكن نكمل الحوار الممل ده بعدين ، انا لازم امشى؟
وايتيكاى:طب استنى ، إيه السؤال اللى انت كنت فاكرنى حاسألهولك و ما سألتوش؟
ولد شاب:انتى حاتعملى زى البرامج اللى فى التلفزيون؟
وايتيكاى:ماشى يا ولد شاب، على العموم أنا سعيده انى عملت معاك الحوار الغريب ده ، غريب بجد ، و بقول لك كل سنه و انت طيب
ولد شاب: و انتى شريره
وايتيكاى:شكرا
ولد شاب:العفو